Delhi-ah odd-even scheme hman leh tum

Delhi sorkar chuan khawpui chhung boruak bawlhhlawh leh traffic tawt lutuk tihziaawmna tura motor number kawpkim leh kawpkim lo tlanchhawk tirna, odd-even scheme ni 15 chhung a enchhin chu a hlawhtling hle niin a ngai.

He scheme hi a thawh hnihna turin March thla hnu lamah hman leh a tum.

Chief Minister Arvind Kejriwal-a hoin scheme thlir letna hi Thawhṭanni khan neih a ni a, sorkar chuan March-April thlaa CBSE Board exam zawh hunah hman leh a tum. Mahse a thawh hnihnaah chuan motor inthlanchhawk tir hian two-wheeler te a huam tawh lo ang.

Delhi Transport Minister Gopal Rai chuan ni 15 chhung odd-even scheme enchhin a nih khan khawpui chhung boruak bawlhhlawh pawh a ziaawm phah niin a sawi a, kawngpui tawt lutuk pawh a thawl phah a ni, a ti.

Minister chuan, "Meeting-ah hian departy hrang hrang, PWD, transport, environment bakah mi thiam dangte pawhin an scheme chungchanga an ngaihdan hrang hrangte an sawi a, an vaiin boruak bawlhhlawh zel tur tiziaawm tura hman leh hi an thlawp vek a ni. Meeting-ah hian thil pahnih ngaihtuah bik ngai kan nei a, chu chu nu leh pate'n an fate school kal an hruai chungchang leh, he scheme-in a tihbuai theih lohna turin mipuite'n car pahnih neih an tum theih dan te a ni," a ti.

Scheme hman chhung hian mipuite harsatna an tawh lohna turin bus pawh tam zawk tlantir a nih thu leh, sorkar chuan public transport chu tihlen a tum zel thu minister chuan a sawi.

"April-June aṭang hian khawpui chhungah bus 1,000 tlantir an ni ang a, July-August ah AC bus 1,000 tlan tir an ni leh ang. Hei bakah hian mi awmthei zawkte'n mahni motor kengchhuak lo a, public transport an hman theihna turin a chuan man sang zawkin Premium Bus Service siam tum a ni bawk," tiin a sawi.

CM Kejirwal-a chuan odd-even scheme an hman chu Delhi mipuite an zawm ṭha hle tih a sawi a, "Scheme hman a nih chhung khan nitin car nuai 20 vel tlanchhuak ang an ni a, heti chung hian dan bawhchhia chawitir chu ni khatah 100, 200 leh 500 te chauh an awm a ni a, an tlem hle a ni. Mipuiin kan hmalakna kha za-ah zain min thlawp angah kan ngai a ni" a ti.