Meeting aṭanga Home Secretary chhuah vangin lungawi lo

Chennai khawpuia tuilianin chhiatna a thlen chungchang ngaihtuaha parliamentary panel-in Thawhṭanni-a meeting an neihna hmun aṭanga Union Home Secretary, Rajiv Mehrishi a chhuah avangin member-te an lungawi lo hle.

Parliamentary standing committee for home affairs-in Chennai chungchang an ngaihtuahnaah hian, meeting laklawh laiin Home Secrtary hi a chhuak a ni. Hei vang hian thu rel mumal thei loin meeting pawh a tawp phah.

Meeting hian Union Home Ministry aiawh leh state sorkar official-te aṭangin tuilianin chhiatna a thlen dan ngaihthlak a duh a ni.

Ministry chuan Tamil Nadu state-a tuilian vanga nunna chan chu mi 470 niin, chenna in nuai 2.7 chuang leh thlai chinna ram hectare nuai 3-a zau a tichhia niin a tarlang.

Ministry report ngaihthlak a nih hnu hian home secretary hi an meeting-na hmun aṭang hian a kalchhuak nghal a ni.

Home Secretary kalchhuah avang hian committee member MP-te chu an lungawi lo hle a, standing committee chu mini-Parliament anga ngaih a nih avangin ngai pawimawh tura an duh thu an sawi. Hei vang hian meeting pawh tihtawp nghal a ni a, MP-te chuan meeting neih leh huna ngaihtuah ṭhat turin an dah ta a ni.