Constitution copy-a Preamble-ah 'Socialist' leh 'Secular' thu mal awm lo: Special session-ah eptu party MP-te an au buai

Parliament special session neih mekah Nilaini khan MP-te hnena sem chhuah, constitution English copy an siama Preamble-ah 'Socialist' leh 'Secular' tih thu mal chu ziah tel a nih loh avangin session neih laiin eptu party member-te an au buai nasa hle.

Eptu party-te chuan sorkar thil tihdan chu constitution beihna a ni an ti a, Congress hruaitu, Adhir Ranjan Chowdhury chuan BJP thil tum nia puhin,"Constitution copy, parliament building thar kan luhpuiah hian Preamble-a socialist leh secular thu mal awm ṭhin kha paih a ni. Heng thu pahnihte hi 1976-a consitution siamṭhatnaah khan telh chauh a ni tih chu kan hria, mahse, vawiinah hian tu pawhin heng thu pahnih tel lohna constitution min pe a nih chuan thil dik lo a awm tihna a ni. Fing phakar taka hmalakna a ni a, thil pawi tak a nih bawk avangin kan ngawi liam mai mai lo ang," tiin a sawi.

CPI-M MP, Binoy Viswam pawhin, Preamble aṭanga sorkarin thu a paih ṭhen ringawt chu sual a ni, a ti bawk. Eptu party hruaitute chuan amendment siam tura hriattirna chhuah a nih tawh chuan Constitution hman lai chu tihtawp tur a ni. Chumi hnua thlak danglam a la awm a nih chuan thil sual a ni, an ti bawk.

Hemi chungchangah hian Law Minister, Arjun Meghwal chuan tun session-a constitution copy an sem chhuah chu a tak tak (original) ang an siam chhuah niin a sawi thung a, "Constitution kan hman ṭan khan Socialist leh Secular tih thu malte hi hman tel a ni lo. Heng thute hi 1976-a 42nd constitutional amendment-ah khan telh chauh an ni," tiin a sawi. Mahse Law Minister insawi fiahna hi eptu party-te chuan tihdan phung ni loa thil thlak danglam tumna niin an sawi ve thung. Constitution copy sem chhuah Hindi version zawkah erawh chuan engmah thlak danglam a awm lo a, hei vang hian eptute chuan tihluih ni ngeiin an hria a ni.

Constitution Preamble siam hmasak berah hian Socialist leh Secular tih thu mal hi dah a ni lo. Indira Gandhi kaihhruai Congress sorkar laia emergency puan a nih khan 42nd amendment hmangin thil tam tak thlak a ni a, preamble-ah pawh socialist leh secular tih hi telh a ni. Hei hi 1994 khan Supreme Court pawhin basic structure doctrine-a tel a ni tiin a lo nemnghet tawh bawk.