Congress-in Madhya Pradesh-ah rally nei ṭan

Congress party chuan state assembly inthlan nei mai tur Madhya Pradesh-ah inthlan campaign khuh hawn nan Nilaini khan 'Jan Aakrosh Yatra' an nei ṭan. Yatra hi hmun sarih aṭanga neih niin, ni 15 chhungin assembly constituency zawng zawng (230), km 11,400 chu kal kim vek hman an tum.

Madhya Pradesh Congress president Kamal Nath chuan,"Ganesh Chaturthi hman a nih mek laiin Congress pawhin Jan Aakrosh Yatra bul kan ṭan ve bawk a ni.Heng yatra-te hi Shivraj Singh Chouhan-a kaihhruai sorkar hnuaia thil dik lo tam tak avanga mipuite tawrhna leh hrehawmna entirna a ni," tiin a sawi. Congress hruaitu senior, Dr. Govind Singh, Ajay Singh, Suresh Pachauri, Kantilal Bhuria, Arun Yadav leh minsiter hlui Jitu Patwari leh Kamleshwar Patel te chuan yatra hi an kaihruai a, Madhya Pradesh hmun hrang hranga temple-ah ṭawngṭaina hlan hmasa vekin rally hi an ṭan a ni.

BJP pawhin Madhya Pradesh-ah hian Jan Aashirwad Yatra kalpui ve mekin a tawp lam an hnaih tawh. State chhung hmun hrang hrangah rally hi kalpui niin, September 25 hian rally khar nan Bhopal-ah an inhmu khawm dawn a, prime minister Narendra Modi chuan thu a sawi ang.