ED-in Ahmedabad hmun ṭhenkhat an dap

Enforcement Directorate (ED) chuan TP Global FX-te'n dan dik loa Forex trading an tih avangin Ahmedabad-ah hmun ṭhenkhat an dap.

Ahmedabad-ah hian dan dik loa sumdawnna kalpuina aṭanga neih ni ngeia hriat, pawisa chheprelh Rs. vbc 1.36, rangkachak kg 1.2, Rs nuai 71 man hu bakah, motor man to, Rs. nuai 89 man ve ve leh mi blackmail nana hman theih document eng emaw zat an man a, bank account pakhata Rs. nuai 14.72 chu an hrensak bawk.

ED-te hian he thil hi Kolkata police-te'n TM Traders leh KK Traders laka FIR an theh luh aṭanga thubuai an chhuina kal zela an hmuh chhuah a ni. "TP Global FX hi Reserve Bank of India (RBI) hnuaia inziak lut an ni lo a, forex trading ti turin RBI aṭangin phalna an nei hek lo. September 7, 2022 khan RBI chuan mipuite hriattir nan leh fimkhurna atan, TP Global FX hming pawh tarlang tel hian Alert list a lo tichhuak tawh bawk a ni," tiin an tarlang.

Prasenjit Das, Shailesh Kumar Pandey, Tushar Patel leh mi ṭhenkhat chu ED-te hian manin, heng mite hian company leh firm lem siamin, forex trading-a investment ti turin mipui an bum ṭhin niin an sawi. "Heng mipui sum an laksak hmang hian anmahni hlawkna tur leh mimal thil leina atan an hmang ṭhin a ni," an ti. ED-te hian Pandey leh Das te hi an lo man tawh a, judicial custody hnuaiah awm mekin, Prevention of Money Laundering Act (PMLA) hnuaia an bank account-a Rs. vbc 121.02 chu an hrensak a, an thil neih, flat, hotel, resot leh lirthei, a vaia hlut zawng Rs. vbc 118.27 hu chu an mansak bawk a ni.