PM Modi-a'n Republic Day-a khuallian turin Biden a sawm

India-a US ambassador Eric Garcetti chuan Nilaini khan G20 summit neih karlaka India leh US hotu lute inkawmnaah, prime minister Narendra Modi chuan kum 2025 Republic Day lawmna neih turah khuallian, Chief Guest ni turin US president Joe Biden a sawm tih a sawi.

Nakkuma Quad summit neih tur hi India thlen hun tur a ni a, India hian Quad kaltlanga a thawhpui ramte chu Republic Day hmanpui tur hian a sawm dawn nia hriat a ni. Quad-ah hian ram pali, India, US, Australia leh Japan te chu thawkhoin, Indo-Pacific tuipuia insumdawn tawnna zalen zawk leh ram hrang hrangte thawhhona ṭha zawk a awm theihna atan hma an la a ni.

Kumin Republic Day lawmnaah khan Egypt president Abdel fattah El-Sisi chu chief guest a ni. India hian Covid-19 hri leng avang khan 2021 leh 2022 tiam loin kum tin Republic Day-ah hian chief guest atan ram dang hruaitu a lo sawm ṭhin a ni. Biden hian PM Modi sawmna hi a pawm a nih chuan, US President zingah India Republic Day lawmnaa chief guest ni thei pahnihna a ni ang. Kum 2015 khan President hlui Barack Obama chu chief guest a lo ni tawh a ni.