Canada-a Indian visa service titawp

British Columbia, Canada-a Khalistan firfiak, Hardeep Singh Nijjar thah a nih chungchanga Canada-in India a inrawlh ngeia a hriat avanga inpuhna thubuai kal zelah nimin khan India chuan Canada-a visa service a tihtawp rih thu a puang.

India baka ram hrang hrang eng emaw zat tana online-a visa siamsak leh buaipui ṭhin, BLS international chuan an website-ah tarlangin,"Visa pek chhuah chungchanga harsatna avangin September 21, 2023 aṭang hian thu leh awm hma chu Indian visa service hi tihtawp rih a ni, " tiin, India khua leh tuite tana Canada visa an buaipui theih rih loh thu an tarlang.

India leh Canada inhmuh thiam lohna karah hian khawvel ram hrang hrang hruaitute chuan boruak ṭha a awm theihna atan ram pahnihte an ngen reng a, Canada PM-in India a puh chu ngaihtuah chian a ṭul hle niin an sawi. Hetih lai hian Canada MP, Prime Minister Justin Trudeau party-a mi Chandra Arya chuan Canada rama Hindu awmte chu hlauthawng lo tur leh, thinrima che chhuak lo turin a chah."Canada-a Hindu awmte hi an ṭhang nasa a, hei hi tute emaw kal vung zualin thikin, India-a let tura vauna leh beih hial an tawk a ni. Amaherawhchu Canada-a Sikh awm zawng zawngte hian Khalistan hi an thlawp vek lo tih erawh kan hriat a ṭha," tiin a sawi.