Prime Minister Modi-a'n State 10 CM-te meeting neihpui
Prime minister Narendra Modi chuan nimin khan state 10 chief minister-te virtual meeting a neihpui a, coronavirus leng mek leh an state dinhmunte a sawipui.
Nimina meeting-a hian Maharashtra, Andhra Pradesh, Bihar, Gujarat, Uttar Pradesh, Telangana, Punjab, Tamil Nadu, West Bengal chief minister te an tel a, Kanataka aiawhin deputy chief minister a tel bawk. Defence minister Rajnath Singh-a'n a telpui bawk a ni.
Heng state 10-te hi India rama Covid-19 kai mek zinga 80% awmna an ni. Maharashtra hi India ram state zinga hri kai tamna ber state niin, Tamil Nadu leh Andhra Pradesh ten an dawt. Hripui a len hnua PM-in chief minister-te meeting a neihpui ṭum 10-na a ni. Thawhṭanni khan Modi hian Assam, Bihar, Uttar Pradesh, Maharashtra, Karnataka leh Kerala chief minister-te chu tuilian an tawrh mek chungchangah virtual meeting a lo neihpui tawh bawk a ni.
Nimina meeting-ah hian hri leng chungchanga an state dinhmunte PM chuan a sawipui a, heng state 10-ten hripui leng mek hi an do hneh theih chuan ram pumin hri leng a do hneh theih dawn a ni, a ti. An sawihona aṭangin Bihar, Gujarat, UP, West Bengal leh Telangana-ahte test tam zawk neih a ṭul tih a lang a ni tiin PM chuan a sawi.
PM chuan mithiamte sawi angin India chuan 72 hour formula a hman a ngai a ni tiin, Covid-19 positive hmuh chhuahin contact a neihte chu darkar 72 chhung zawn chhuah a, test leh khung hran nghal an ni tur a ni, a ti. Hei hian hri darh tur venna kawngah nasa takin a pui dawn tih a sawi.