Covid-19 kai zinga 69.80% dam tawh

Ministry of Health and Family Welfare-in report a tihchhuah tharah hri kai hmuh chhuah thar mi 53,601 an awm leh a, ni li chhung a zawna sing ruk chuang hmuh chhuah thar an awm hnuah nimin hian a tlahniam leh deuh a ni. Hemi nen hian ram chhung hmun hrang hrangah hri kai mi 22,68,675 an awm tawh.

Darkar 24 chhung­in hri kai tawh dama puan mi 47,746 awm lehin hri kai tawh zinga mi 15,83,489 lai chu an dam tawh a, recovery rate hi 69.80% ni tawhin 70% a hnaih tawh hle. Ramchhung hmun hrang hrangah hripui vanga thi mi 871 an awm leh avangin hri thihpui mi 45,257 an awm ta a, mi 6,39,929-in la kai mekin thihpui rate hi a tlahniam sawt hle a, 1.99% a ni tawh a ni. 

Indian Council of Medical Research (ICMR) chuan nimin khan Covid-19 sam­ple 6,98,290 lai mai an enfiah leh a, hei nen hian hri len ṭantirh aṭanga nimin thleng khan sample 2,52,81,848 an endik tawh a ni.

ICMR hian nimin thleng khan sample test-na atana pawmpui laboratory 1415 a nei tawh a, chung zinga 944 chu sorkar laboratory niin, 471 chu private laboratory a ni thung.

Maharashtra chu India ram State/UT zinga Covid-19 kai tamna ber an la nih chhunzawm zel a, an sang filawr hle bawk. Nimin khan hri kai hmuh chhuah thar 9,181 an awm leh avangin mi 5,24,513-in hri an kai tawh a ni. Heng zinga 3,58,421 lai chu enkawl dam an ni tawh a, 18,050-in thihpui tawhin hri kai mek 1,48,042 an la awm.

State/ UT zinga hripuiin a nghawng nat ber dawttu Tamil Nadu-ah chuan nimin khan hri kai hmuh chhuah thar 5,914 an awm leh a, Tamil-ah hian hri kai 3,02,815 an awm tawh a ni. Heng zinga 2,44,675 chu an dam leh tawh a, 53,099-in la kai mekin 5,041 an thi tawh. Andhra Pradesh-ah chuan hri kai 2,35,525 an awm tawh a, 2,116-in thihpui tawhin 1,45,636 chu an dam leh tawh bawk a ni.