Delhi sorkarin Police Commissioner report pe turin hriattir

Public rally a neih ṭuma Chief Minister Arvind Kejriwal-a pentuia theh a nih chungchangah Delhi sorkar chuan Delhi Police Commissioner BS Bassi chu report kimchang pe turin a hriattir a, police-te hian hetiang pawikhawihna ang hi a thlen nawn tawh lohna turin ruahmanna an siam em tihte a zawt bawk.

Principal Secretary (Home), SN Shai chuan Bassi hnenah hian lehkha thawnin, January 17-a odd-even scheme hlawhtling taka kalpui a nih avanga Delhi mipuite hnena lawmthu sawina vantlang inkhawm buatsaihnaa Kejriwal beih a nih dan chu chiang taka sawi turin a ti.

Rally-naah hian hmeichhe pakhat, kum 26 mi Bhavna Arora chuan CNG scam chungchang avanga lungawi loin CM hi pentuiin a theh a ni.

Arora hi Punjab-a Aam Aadmi Sena hruaitu niin a inchhal. Delhi Court-ah hruai a ni tawh a, ni 14 chhung judicial custody-a dah tura tih a ni a, IPC section 186 leh 353 hnuaiah thubuai siamsak a ni.

AAP chuan CM Kejriwal beihnaah hian BJP chu a ruahmantu bera puhin, Delhi Police-te nen inthurualah a puh.