Pathankot case: Pakistan team airbase-ah kal remti lo

Minister of State for Defence, Rao Inderjit Singh chuan Pathankot airbase beih a nih chungchang chhuitu tura Pakistan-in team a siam chu Air Force Station-ah hian an kal phalsak a ni dawn lo tih a sawi.

Pakistan team hian thil thlen dante chhuichiang turin airbase-ah hian team tirh a tum thu a lo sawi tawh a, hei hian sawizui a hlawh hle. Mahse minister chuan hei hi a remti dawn lo tih a sawi.

Hetihlai hian airbase beitute leh beih a nih dan chhuitu, National Inves≠tigation chuan Thawhlehni khan pawikhawihnaa inhnam≠hnawiha rinhlelh, Gur≠daspur Superintendent of Police (SP), Salwinder Singh chu lie detector hmangin thu a zawtfiah. NIA-a top official-te chuan Pathankot airbase beitu firfiak paruk an kahhlum zinga pahnih chu chhunglam mi an nih mai theih thu an sawi.

Firfiakte ruang hi forensic mithiamte'n an enfiah mek a, a result hi karlehah a chhuah hman beisei a ni.

Airbase an beihna hmuna firfiakte phone an chhar aṭangin chiang zawkin an nihna hi hriatchhuah thuai beisei a nih thu official-te chuan an sawi. Sorkar thuchuah chuan January 2-a Pathankot airbase beitute chu mi paruk an nih thu a lo sawi tawh a, mahse an zinga pali chauh hi rampawn lam, Pakistan aṭanga Punjab ramri paltlanga rawn lutru tih finfiah an la ni.

NIA official-te chuan airbase beitute ralthuam AK-47 pali chauh an hmuhchhuah avangin mi dang pahnihte hi chhung lam mi nia rinhlelhna a tizual hle niin an sawi. Mahse heng mi pahnihte nihna hi hrechhuak tur chuan airbase-a chengte bakah tualchhung mite chu zirchian vek an ngai dawn a ni. Airbase-ah hian mi 3,500 vel an cheng a ni.