BJP-in minister bang tura phutna hnawl

Hyderabad Central University-a Dalit zirlai pakhat a intihhlum kaihhnawihah Congress party chuan union minister pahnih- Smriti Irani leh Bandarru Dattatreya-te chu bang turin a phut. Mahse BJP chuan Congress party thil phut hi hnawlsakin, Dalit zirlai thihna hi Rahul Gandhi chuan politics khelhna remchangah a hmang a ni, a ti.

BJP chuan Congress chu a politics khelh danah a intihniam hle a ni tiin, zirlai Rohith Vemula intihhlum leh a laka University-in hremna a pek chuan inzawmna a nei lo a ni, a ti.

Party national secretary Srikant Sharma chuan an minister-te thlavang hauhin, Dattatreya hian zirlai
ṭhenkhatte ram duhdan dodal zawnga chetnaa thleng nia complaint an thehluh chu Human Resources Development (HRD) Minister, Smriti Irani hnenah a hlanchhawng leh mai a ni, a ti. Minister Irani hian complain a hmuh hnu hian a ṭul anga action la turin university hi a hrilh.

Sharma chuan ministry-in thawm a neih hmain university chuan Vemula leh zirlai dang pali-te chungah action a lo tawh niin a sawi bawk.

Hyderabad Central University(HCU) vice chancellor Appa Rao pawhin zirlai thihna thleng avang hian university zirlai lungawilo te'n VC a nihna aṭanga bang tura an phutna chu zawm a tum loh thu sawi a, hemi rual hian Vemula chu zirlai thiam thei tak a nih thu a sawi. Rao chuan, "Awmze nei leh mumal takin engkim a tih theih a ni. Thutlukna pawh rilru fim taka siam tur a ni. Committee rintlak takin hemi chungchang chhui a, ka thiltih dante a dik lo a ni tih a hmuchhuak a nih chuan bang tura min phutna hi ka la ngaihtuah ang," a ti.

Rohith-te hremna pek chungchanga inrawlha HRD ministry puhna pawh chhangin, Vice Chancellor chuan, "Hei hi university thutlukna a ni a, HRD ministry nena inkaihhnawihna engmah a awm lo," tiin a sawi.