Dalit zirlai intihhlum vangin professor 10 an bang Thu dik lo sawiah HRD Minister an puh

University of Hyderabad-a Dalit zirlai pakhat inawhhlum avanga buaina kal zelah, nimin khan he university-a professor 10 an bang a, zirlai thi ta tana rorelna dik pek an phut thu an sawi. Professor bangte hi SC/ST vek an ni.

University hian Dalit zirlai, research scholar Rohith Vermula leh zirlai dang pali-te chu hotel aṭangin a hnawtchhuak a, hrem an nih hnuah Rohith hi hostel-a a ṭhianpa room-ah a inawkhlum a ni.

Dalit zirlaite hrem an nihnaah hian union minister pahnih, Bandaru Dattatreya leh Smriti Irani-te chu inrawlhah puhin, bang tura phutin university zirlaite hian lungawi lohna an lantir mek. Mahse nawrh huaihawt hi chi leh chi inkara inbeihna thlentir tumna hmanrua tii Irani chuan a sawi.

Professor-te chuan Human Resource Development (HRD) minister Smriti Irani-i chu thudik tawk lo sawiah an puh.

Thuchhuah siamin, University-a SC/ST Teachers and Officers' Forum chuan, "Minister zahawm tak Smriti Irani-i thusawi dik lo tak chhan letna atan, keini SC/ST zirtirtu leh officer-te chuan kan nihna aṭanga ban kan tum ta a ni," a ti.

Irani-i kaihhruai HRD ministry hian Dattatreya-a'n university chu chi bing zawng≠a thil la te, firfiak taka che leh ram politics dodaltute awmna hmun a ni tia a zualko hnuah, university hnenah action la turin
ṭum nga zet lehkha a thawn nia sawi a ni.

Professor-te chuan Vermula hremtu university body-ah Irani-in Dalit professor pawh a tel nia a sawi chu thu dik lo a nih thu an tarlang bawk.

"Minister-in hremna petu sub-committee chu Dalit professor kaihhruai a ni tia a sawi chu thu dik lo a ni. Committee hotu hi professor Vipin Srivastav a nia , Dalit a ni lo," an ti. Member paruk awmna sub-committee hi Vermula leh zirlai dang pali-te hrem a, hostel aṭanga hnawhchhuaktu a ni.

Eptu party hrang hrangte chuan Vermula intihhlum chungchangah hian BJP leh NDA sorkar an bei nasa a, hnam hnuaihnungte enhrangah an puh.

Congress vice president Rahul Gandhi, CPI(M) hotu Sitaram Yechury, Trinamool Congress hruaitu Derek O'Brien leh YSR Congress party hotu YS Jagamohan Reddy-te chuan university campus-a zirlai nawrh huaihawt mekte hi a hmunah an tlawh tawh bawk. Delhi Chief Minister Arvind Kejriwal leh BSP hotu Mayawati-te pawhin nimin khan kal an tum.