CBI-in TMC MP thu zawhfiah turin ko

Saradha Group-in investor-te sum tam tham tak a tihchingpen chungchang chhuitu, Central Bureau of Investigation (CBI) chuan Trinamool MP leh Hindi nitin chanchinbu pakhat editor, Vivek Gupta chu thu zawhfiah turin a ko.

Vivek Gupta hi Saradha aṭang hian sum tam tham tak dawngah puh a ni a, Enforcement Directorate pawhin thu a lo zawt tawh a ni.

Investigator-te'n Saradha-in Ponzi firm hnenah bank kaltlangin cheng nuai thum an pek thu hmuhchhuah a nih
aṭangin Gupta a inrawlh tih hi hriat a ni. Saradha hian printing press eng emaw zat hnenah regular takin pawisa an pe
ṭhin a, heng zingah hian Saraswati Printing Factory pawh a tel. A chang chuan sum hi a nuai bi-in an pel a, a chang chuan vaibelchhe chuangte an pe bawk.

TMC MP suspend, Kunal Ghosh chuan Gupta hian Saradha group
aṭang hian printing order lian tham tak tak a hmu fo niin a sawi. Investigator-te chuan Gupta hnenah hian direct-in sum pek a ni fo tih pawh an hmuchhuak a ni.

Kum 2012 leh 2013 inkar khan Saradha account aṭang hian Vivek Gupta account-ah vawi eng emaw zat sum hi pek a ni.

Gupta hian Saradha Group-ah hian inhnamhnawihna a neih loh thu a sawi a, mahse investigator-te chuan Saradha group hnen aṭanga sum a dawn chhan hi an hre duh tih an sawi.

Saraswati Print Factory director list-ah Vivek Gupta hi hming hi a lang tel lo a, mahse director zinga pakhat nen hian company dangah Gupta hi an awm dun a ni.