Rajpath-a building 71 khar dawn

January 26-a Republic Day lawmna tur atana inbuatsaih mek a ni a, venhimna lam pawh khauh taka kalpui tum a ni.

Republic Day lawmna tur, Rajpath bula building sang 71-te chu January 25 hmain khar tir an ni dawn a, heng inte hi police-te chuan uluk takin an enfiah ang. In chungah hian sniper-te dah vek tum a ni bawk.

Kum 2015 Republic Day lawm dawn khan building 71-te hi khar an lo ni tawh bawk a, kum 2014-ah erawh chuan 45 chauh khar tir an ni thung.

Kumina khar tir a tam lehna chhan chu venhimna lam a ngaih vang niin officer chuan a sawi a, firfiakte'n Paris khawpui an beih hnuah kumin hian France President Francois Hollande chu khuallian a ni dawn a, fimkhur a ngai dawn hle a ni, a ti.

Heng building khar tura an tihte aṭang hian Rajpath hi a lang vek thei lo a, mahse pawikhawih tumte tan awmna remchang a neih theih avang≠in khar vek an ni, a ti.

Republic Day thlen hmain building khar tura tihte hi police-te chuan room tin uluk taka enfiahin, an enfiah tawh chin chu an kalh nghal zel ang.

Delhi khawpui chhunga venhimna khauh taka kalpui a ni dawn a, R-Day pual hian venhim hna thawktu paramilitary force company 150 dah an nih dawn bakah, Rajpath chu no-fly zone atan puan a ni bawk. Lei lam leh boruak aṭang pawhin Prime Minister Narendra Modi leh France President Hollande-te hnaihah eng thil mah dah phal a ni lo ang.

Mi pawimawhte
ṭhutna chu France commando, NSG leh SPC-te'n an veng dawn a, venhimna hi thuah sarih vela kalpui tum a ni a, a pawn berah Delhi Police-te dah an ni ang.