Bengal sorkarin zirlaite pheikhawk man tur pe dawn

West Bengal Chief Minister, Mamata Banerjee chuan an state chhunga primary school zirlai zawng zawng hnenah school pheikhawk man an pe dawn tih a sawi.

Chief Minister hian he thu hi a Facebook-ah Nilaini khan a puang a, hemi atan hian state sorkar chuan cheng vaibelchhe 154 a ruahman a ni, a ti.

Mamata Banerjee chuan primary school zirlaite pheikhawk leisak tura thu≠tlukna a siam chhan hi Thawhlehni-a Burdwan-a school naupang, pheikhawk bun tur nei lote a hmuh vanga a ni, a ti.

Zirlaite pheikhawk bun loa an kal a hmuh chuan state education department hnenah rang taka hma la nghal turin a hriattir a, Nilaini khan state chhunga pawl 1-4 zirlai zawng zawngte pheikhawk leisak an nih tur thu hi a puang ta a ni.

Facebook-a Banerjee-i thu puan hian like tu pawh a ngah chak hle a, mi tam takin an fak a, mahse sawiseltu pawh an awm tho a ni. Ṭhenkhat chuan pheikhawk leina tur sum chu khawi fund aṭanga pek tur nge tihte an zawt a, pheikhawk sem chu zirna lama an state-in harsatna a tawh mek chinfelna a nih loh thu le, kum li chhung zet zirtirtu lak thar a nih tawh loh avangin naupangte'n zirtirtu an mamawh zawk thute an sawi.