IS firfiak nia rinhlelh mi pathum man
Republic Day lawmna tura inbuatsaihna kal zelah venhimna lam pawh khauh taka kalpui a ni a, police-te chuan nimin khan Islamic State (IS) firfiak nia rinhlelh mi pathum an man.
Karnataka state-ah mi pahnih leh Maharashtra-ah mi pakhat man an ni. Karnataka-a mi pahnih mante hi Najmul Huda leh Syed Hussain an ni a, IS pawl thlawptu nia sawi an ni. Mumbai-ah Maharashtra ATS leh National Investigation Agency (NIA) ten rinhlelh mi pakhat an man bawk.
Ni thum liamtaah khan Delhi Police-te chuan Haridwar-a Ardh Kumbh Mela neih mek tihbuai tumna an hriatchhuah thu sawiin, Uttarakhand-a IS nena inzawmna neia rinhlelh mi pali an man bawk a ni.
IS thlawptute hian online hmangin ṭan an la nasa hle a, hei vang hian sorkar laipui chuan state tinte chu fimkhur turin a chah. Sorkar official chuan, "IS vauna hi a tak ngei a ni. Republic Day kan lawm tur hi fimkhur hle a ngai. Ramchhung khawi hmunah pawh pawikhawihna thleng thei a ni hria a, fimkhur turin mi tinte kan chah a ni" a ti.
Online hmanga IS te chanchin thehdarh a, India mite an pawl member atana lakluh tuma puh, Indian Oil Corporation executive, Mohammad Sirazudin chu nikum December thla khan man a lo ni tawh a ni.
Delhi-a Republic Day lawmna neih turah hian France President Francois Hollande chu khuallian a ni dawn a, Ningani khan Bengaluru-a French consulate chuan President Hollande-a'n India-a zin a tum ṭhulh tura vauna lehkha a dawng. He lehkhaa thu inziak hi kimchanga puanzar a ni lo a, a thawntu pawh hriat a ni lo niin police-te chuan a sawi.
Firfiakte'n Pathankot airbase an beih hnuah ramchhunga defence hmun pawimawha venhimna kalpui a nih dan ennawn turin sorkar chuan committee a din tawh bawk. Defence Minister Manohar Parrikar chuan committee din a nih thu hi Ningani khan a sawi a, kar khat hnuah hna an thawk ṭan thei dawn a ni, a ti.
Committee hian military base hrang hranga dinhmun te, beih an tawh theih dante, venhimna kalpuina tura ngaih pawimawh hmasak turte a enfiah ang a, tualchhunga commander-te pawh an kawm bawk ang.