Rohith Vemula-a lehkha hnutchhiah enfiah dawn

University of Hyderabad-a Dalit zirlai intihlum, Rohith Vemula-a lehkha hnutchhiah chu forensic mithiamte'n an enfiah dawn.

Hyderabad police-te chuan labora-tory-a enfiah tur leh, a hawrawpte endik turin an thawn tawh a, ni reilote hnuah result hi an hre thei dawn tih an sawi.

Rohith Vemula hi University of Hyderabad-a research scholar a ni a, nikum August thlaa Rashtriya Swayamsevak Sangh (RSS) zirlai pawl, Akhil Bharatiya Vidyarthi Parishad (ABVP) hruaitu pakhat kutthlaka puh an nih avangin university thuneitute chuan kar hnih liam taah khan midang pali nen hostel aṭangin an hnawtchhuak a ni.

Hostel aṭanga hnawhchhuah an nih bakah cafeteria leh common area dangte pawhan hman khapsak an ni a, an panga hian campus pawna puan-inah an khawsa zui a ni. Pathianni khan Rohith-a hi hostel-a a thianpa room-ah a inawkhlum a ni.

Hrem an nih chhanah hian union minister pahnih, Smriti Irani leh Bandaru Dattatreya-te inrawlhah puh an nih avangin zirlaite'n lungawi lohna an lantir mek a, eptu pawl hrang hrangte minister-te hi bang turin an phut bawk.

Hyberabad police chuan Rohith-a intihhlum kaihhnawih-ah hian FIR an ziaklut tawh a, hetah hian Union Labour Minister Bandary Dattatreya, Vice Chancellor Appa Rao, Telangana BJP MLC Rama-chandra Rao leh zirlai pahnih hming an ziak lang. Rohith-a hian a intihhlum dawna a lehkha hnutchhiahah hian a ziah tawh hnu paragraph khat chu a thaichhe leh vek a, a sirah amah ngeiin a thaichhiat a nih thu pawh a ziaklang bawk.

Police-te chuan a thuziak a thaichhiat takah hian eng nge a ziah tih leh, ama thaichhiat ngei a ni em tihte hriat an tum dawn tih an sawi a, a mobile phone awmna pawh zawngin, a call record leh message te hriat an tum tih an sawi.

Report ṭhenkhat chuan Rohith-a hian a thaichhiat takah hian Ambedkar Students Association chunga a lungawi lohna thu a ziak niin an tarlang.

ASA, SFI leh a dangte chu amahni duh ang chauha kal, midangte rilru leh duhdan pawh ngaihtuah sak lo nia a ziah thu an sawi.

Ningani khan university chuan Rohith-a ṭhiante pali hremna chu a hnukdawk. Hetihlai hian university-a Dalit zirtirtu 15-te chuan Union Education Minister Smriti Irani-in Rohith-a intihhlum chungchanga thu dik lo a sawi avanga lungawi loin banna an thehlut tawh a ni.

Zirlai nawrh huaihawt mekte chuan Rohith-a ṭhiante hremna hlih ni mah se, a thihnaa mawhphurtute hrem an nih hma chuan lungawi lohna lantir chhunzawm zel an tum. January 25-a 'Chalo UoH' rally neih an tum chu zawm turin university danga zirlaite an sawm nghal bawk.

University thuneitute'n zirlai pali-te hremna an hnuhdawh rual hian campus chhunga internet leh Wi-fi connection an titawp nghal a, computer centre leh library-te pawh khar an ni bawk. Hei hi thuneitu sang zawkte'n ti tura an hrilh vang niin an sawi.