Delhi-ah car free day an hmang

Delhi sorkar chuan nimin khan zing dar 8 aṭang tlai dar 4 thlengin Vishwavidyalaya Metro Station leh Chhatrasal Stadium inkarah car tlan phal loh ni, car free day a hmang.

Car free day programme hi Delhi khawpui chhunga traffic tawt lutuk tihziaawmna leh, motor khuin boruak a tihbawlhhlawh zel tur venna kawng khat atana 'Ab Bus Karein' campaign hnuaiah neih a ni.

Delhi sorkar chuan he programme hi thla tinin ni 22-naah hman ziah turin a lo rel tawh a, tun ṭum hi vawi li a hmanna a ni.

'Ab Bus Karein' campaign hi mipuite hnenah an veivahna atana car hmang kher lo a, public transport hmang uar zawk tura an cho-na a ni a, he ni pual hian Deputy Chief Minister Manish Sisodia hoin cycle rally neih a ni a, Delhi University zirlai leh zirtirtute an tel.

Car free day hmanna kawngpui bikah hian mipuite'n veivahna lamah harsatna an tawh lohna turin DTC bus pawh tam zawk tlantir ṭhin a ni bawk.

Transport minister Gopal Rai chuan car free day an hman leh tur chu South Delhi lamah neih tum a nih thu a sawi a, "Delhi khawpui boruak bawlhhlawh zel tur tihziawmna atan kawng hrang hrangin hman kan la a ni" a ti.