Rajya Sabha-in Women's Reservation Bill pass ve leh

Women's Reservation Bill chu Ningani khan Rajya Sabha-a sawiho a nih hnuah pass a ni ve leh. Bill sawihonaah hian mi 72 laiin thu sawiin, Rajya Sabha rorel inkhawma member kal zawng zawng mi 214 te chu Bill duh lamah hian an phar vek a ni. Women's Reservation Bill hi Constitution (128th Amendment) Bill emaw Nari Shakti Vandan Adhiniyam emaw tih a ni.

Bill hi pass ni mah se eptu party-te chuan hmeichhe tana 33% reservation siam chhunga Other Backward Classes (OBC) hmeichhiate huam teltir a ni ve lo leh, house-a Bill put luh tlai a ni chu an hriatthiam loh thu an sawi. Eptu MP-te chuan Bill hming an puttir 'Nari Shakti Vandan Adhiniyam' chu sorkarin thil ropui tak a tih ang maia lantir tumna a ni tiin, thil ropui tak ni hran lo, constitution-in min pek kan chanvo liau liau a nih thu an sawi. Eptu party-te chuan Bill pu lut tura sorkar laipuiin hun a mamawh rei lutuk leh Bill chu dan anga hman a nih hun tur atan kum 2029 daih sawi rik a la ni chu an sawisel bawk.

Congress MP Ranjeet Ranjan chuan,"BJP sorkar hi tunah hian hmeichhiate ngaihtuah ang takin inlantir thar mah se, Manipur-a hmeichhe zahawmna tihbawrhban a nih lai te, hmeichhe wrestler-te an nawrh laite khan a ngawi tlat thung a ni. Parliament building thar hawn a nih pawhin kan hmeichhe President chu sawm a ni lo," a ti. Sorkar laipui erawh chuan Modi rorelna hnuaia hmeichhiate tana hmalakna an neih hrang hrang te sawiin, Ujjwala scheme mai bakah mipa leh hmeichhe piang dinhmun ṭhat tawh zia te, Army school-a hmeichhiate an luh ve theih tawh dan te an sawi thung.

Prime minister Narendra Modi chuan inlungrual taka Women's Reservation Bill pass a ni thei chu lawmawm a tih thu leh, an bill pass chuan mipuite rilruah thil ṭha tak a thlen a beisei thu a sawi. Rajya Sabha chairman, Jagdeep Dhankar pawhin Women's Reservation Bill pass a ni chu India ram tana mellung pawimawh tak a nih thu a sawi ve bawk.