2027-ah India hi economy lian ber pathumna a la ni dawn : RBI Deputy Governor

Reserve Bank of India (RBI) Deputy Governor, Michael D Patra chuan kum 2027-ah chuan India economy hlutna hi USD trillion 5 a ni tawh ang a, market-a thil inlei tawnna dinhmun aṭangin khawvela ram economy lian ber pathumna a ni tawh ang, tiin a sawi.

National Bank of Cambodia buatsaih, 16th SEACEN-BIS High-level seminar-ah Patra hian thu sawiin,"Tun kum 20 lo awm turah hian khawvel pumpui economy che vel hi khawchhak lama Asia-ah hian a vir vel dawn a ni tih hi mi zawng zawng rin dan a ni tawh a ni. India hi khawvela mihring tamna ber kan ni a, mihring billion 1.4 awmin, mihring kum lak rual hi kum 28 niin kan naupang ber bawk. Hei hi kum 2027-a USD trillion 5 economy kan nih theihna chhan tur bul ber a ni. Mihring piang leh dam tam lam ṭhatna hi kum 2018 aṭang khan inṭanin kum 2040 thleng tluang taka a kal tura ngaih a ni, heti a nih chuan hnathawk tur kan ngah tihna a ni ang. A dawt lehah chuan financial sector ṭhanna leh ṭhat zel avang hian India mihring dinhmun nen hian a inhmu rem hle a ni tih hi vawiina ka sawi tum ber pawh a ni," a ti.

"International Monetary Fund (IMF) Outlook for Asia and the Pacific chuan Asia khawchhak lam ramte hian kum 2023 chhung ngei pawh hian khawvel economy ṭhanna hmun 3-a ṭhena hmun hnih hi an thawh chhuah a ni ang a, India ngei pawh hi kum 2023 leh 2024 chhungin khawvel economy ṭhanna atana ram thawh hlawk parukna a ni bawk ang," tiin Patra chuan a sawi.