EC-in Electoral roll atan Aadhar number a ngai kher lo tih SC hriattir

Election Commission of India (EC) chuan Chief Justice of India DY Chandrachud kaihhruai bench hmaah Registration of Electors (Amendment) Rules, 2022 hmanga electoral roll siam thar leh siam ṭha turte'n Aadhar number an pek tel kher ngai anga sawi awm chu a dik lo niin a sawi.

EC aiawha ding, senior advocate, Sukumar Pattjoshi chuan,"Registration of Electors (Amendment) Rules, 2022 Rule 26-B hian Aadhar number pek kher hi a phut lo. Hei vang hian Election Commission chuan thuchhuah siam tawh sawi fiahna pek a tum a ni," a ti. Hetih lai hian EC chuan electoral roll siam mekah Aadhar number vbc 66.23 an dah tel tawh thu court hi an hrilh.

The Registration of Electors (Amendment) Rules, 2022 hmanga sorkar laipuiin thuchhuah a siamah electoral roll siam tur tana Aadhar number pek tel ngai a tih chu G. Niranjan chuan thil dik lo a ni tiin petition a theh lut a ni. Petition-ah hian "Electoral roll atana Aadhar number pek tel ngai hian voter-te data hman sual theihna a keng tel a ni. Aadhar number pek tel ngai lo hian voter-te hian duhthlanna an nei tur a ni," tiin G. Nirajan aiawha ding, advocate Sravan Kumar chuan a sawi.