Ni thum cham turin France President a lo thleng

France President Francois Hollande chu ni thum cham turin nimin khan India a rawn thleng a, Thawhlehnia Delhi-a Republic Day lawmnaah khuallian a ni ang.

Tun ṭum hi official-a a rawn zin vawi hnihna a ni. Nimin tlai khan Hollande hian Chandigarh khawpuia Indian CEO forum-ah thu a sawi nghal a, hemi hnu hian India-France Business Summit a hmanpui bawk.

France ram hruaitu hi sorkar official bakah sumdawng aiawh eng emaw zatin an rawn zui.

Chandigarh a tlawh dawn vang hian venhimna lam pawh an tikhauh hle a, khawpui chhungah armed police leh paramilitary force ṭhahnem tham tak duty tir a ni.

Vawiin hian Hollande leh Prime Minister Narendra Modi-te chuan Delhi-a in-biakna an nei dawn a, he hunah hian India-in France aṭanga fighter jet 36 a leina tur, hun rei tak buaipui tawh chu an tihfel tawh beisei a ni.

Nikum-a PM-in France a tlawh ṭum khan, France aṭangin cheng vaibelchhe 60,000 senga Rafales jet 36 lei remtih a nih thu hi a puang a ni. Mahse a man tur chungchangah ram pahnihte hian inremna an la siam theih loh vangin kum khat dawn tihkhawtlai a ni a, tun ṭumah hian a hmawr an bawk theih a beisei thu France ambassador Francois Richier chuan a sawi.

Ram hruaitu pahnihte hian inbiakna an neih hnuah Maharastra state-a France-in nuclear reactor paruk a siamna tur ruangamte an puan theih beisei a ni. Hemi atana inremna hi kum nga kalta khan an lo ziak tawh.

Hollande leh Modi hian International Solar Alliance headquarters thar-ah lungphum an phum nghal ang. He pawl hi ram 121-te'n solar power tihlenna tura nikum November thlaa Paris COP21-a an lo din kha a ni.

Naktuka Republic Day lawmnaah PM Modi leh President Hollande-te hi an ṭhut dun rin a ni a, tun ṭum Republic Day Parade-ah hian France sipaite an inlan tel dawn a, hei hi ramdang sipai an tel ve ṭum khatna tur a ni.