JNU zirlaite'n tiamchin awm loin chaw nghei

Jawaharlal Nehru University (JNU), Delhi-a zirlai pathumte chuan Dalit zirlai pakhat, Rohith Vemula intihhlum chungchanga mawhphurtua puh, union mi≠nister pahnih Bandaru Dattatreya leh Smriti Irani bakah University of Hyderabad vice-chancellor Appa Rao Podile-te chunga action lak phutin tiam chin awm loin chaw an nghei.

Rohith Vemula intihhlum chungchangah Hyderabad leh Delhi-a zirlaite chuan "Justice for Rohith" tih hmangin lungawi lohna an lantir mek a, Kolkata-ah pawh buatsaih tum a ni bawk.

Kar kalta inrinni zan aṭang khan zirlai pathum, School of International Studies-a PhD student Lenin Kumar, Centre for Studies in Regional Development-a masters student Shushree leh political studies student Shubhanshu-te chuan JNU administrative block-ah chaw an nghei ṭan a ni.

Shushree hian sorkar laipui hnenah open letter thawnin, sorkar thil tih danah a lungawi loh thu a sawi. Zirlai pathum-te chuan Rohith-a chhungte chu chhawmdawlna pe turin an phut bawk.

Shubanshu chuan, "Rohith-a JRF (Junior Research Fellowship) chu a chhungten sum an hmuhna pui ber a ni. A chhungte sum dinhmun hi ngaihtuah sak tur leh, Rohith-a nauin a thil zir chak leh tum a puitlin ngei theihna turin an chhungkua hi ngaihsak an ni tur a ni," a ti.

Zirlaite chuan JNU-a kalpui mek, Equal Opportunity Office chu university dangah pawh ti ve tura an phut thu an sawi bawk.

Tamil Nadu state-a SVS Naturopathy and Yoga College, Vilupuram-ah zirlai hmeichhe pathum chu Pathianni tlai khan an intihlum ve leh.

Zirlai pathumte hi an college bula tuichhunchhuahah an zuangthla nia sawi a ni. An intihhlumna bula lehkha hmuhah chuan college enkawltute'n an nawr nasat avanga hetiang thil tih ngai ta an nih thu an ziak.

Police-te chuan mahni intihlum nia sawiin thubuai an ziak lut a, an intihhlum chhan hriat tuma chhui mek a ni.

Hetihlai hian zirlai chhungte chuan thah niin an sawi thung a, lungawi lohna an lantir avangin Tamil Nadu sorkar chuan Pathianni khan an college hi khar rih turin a hriattir.

College zirlaite hian fee tihsan a nih bakah, zirlaite tan college hian facility engmah a pe lo niin an sawi. Hun eng emaw chen chu zirlaite hian nawrh an lo huaihawt tawh a ni. Zirlaite chuan hmeichhe pathumte intihhlumnaah hian college chairman fapa, Vasuki Subramanian chu mawhphurtua puhin man turin an phut.

District collector, P Lakshmi leh police official-te chuan zirlai pathum chhungte hi hmuin, a ṭul anga action an lak tur thu an sawi. Police-te hian Subramanian leh midang pathumte chu thu an zawtfiah tawh bawk.