Vietnam-ah satellite tracking station siam dawn

India chuan earth observation satellite aṭanga thlalakte a lakchhawnna turin Vietnam chhim lamah satellite tracking station siam a tum a, hei hian China leh South China sea bialte a huam tel dawn a ni.

Satellite tracking station siam tum hi China chuan a lawm loh hle rin a ni a, mahse India leh Vietnam inlaichinna erawh a tinghet thung dawn a ni.

Vietnam leh China hi South China Sea inchuh avangin hun rei tak an buai tawh a, Vietnam hian surveillance leh technology ṭha zawk neih tumin a bei reng a ni.

Station siam tur hi civilian facility tur nia sawi ni mah se, mi thiamte chuan thlalak hmuhte chu sipaite tan pawh a ṭangkai thei dawn tiin an sawi.

Station siamna tur senso hi Indian Space Research Organisation (ISRO) in a tum dawn a, satellite tracking leh data reception center chu Ho Chi Minh city-ah dah a ni ang. He station siamna atan hian dollar maktaduai 23 vel a ngai dawn niin media lam chuan an tarlang.

India hian earth observation satellite hi 11 a nei mek a, hengte hian resolution leh area hrang hrang aṭangin thlalakte an rawn thawn ṭhin niin ISRO chuan a sawi.

Vietnam hian kum 2013 khan a vawi khatna atan earth observation satellite chu a kapchhuak ve tawh a, mahse high resolution image a pechhuak thei lo nia sawi a ni.

Official-te chuan station siam ṭan hun tur hi an la sawi thei lo tih sawiin, Vietnam thuneitute nen an inbe mek tih an sawi. Viet≠nam Foreign Ministry pawhin project siam tur hi a nemnghet tawh a, mahse chanchin kimchang erawh a la tichhuak lo.

India hian Vietnam-in patrol boat a leina turin dollar matkaduai 100 puktir a remti bawk a, hei bakah hian Vietnam submariner-te chu India-ah a training tir bawk.