PM Modi-a'n Vande Bharat rel thar pakua vai liam

Prime minister Narendra Modi chuan nimin khan state 11 tana chhawr theih tur, Vande Bharat rel thar pakua chu a vai liam. Vande Bharat relte hi anmahni kawng ṭheuhah chuan a chak ber tur an ni.

Vande Bharat rel tharte hi rang zawka zinna atan leh passenger-te tana nawmna thlen tura beisei an ni a, Udaipur-Jaipur Vande Bharat Express hi a hmaa hemi kawnga rel tlan chak ber aia minute 30-in a thleng rang zawk ang.

Rel siamtute hian mipuite ngaihdan an lak aṭangin thil ṭhenkhat an tidanglam. Rel chhunga thil thar dah zingah, seat tih awn theihna 17.31 degree ni ṭhin chu 19.37 degree-a tihsan a ni bawk a, cushion dup zawngte pawh tihdanglam niin, executive class-a seat sen ṭhin chu a pawl dal rawnga thlak a ni bawk. Seat hnuaia mobile charge-na chu siam rem a ni a, ke dahna tur tihsei belh a ni. Rel chhunga tui dehna pawh tui per tlem tura duan thar niin, thil tihdanglam tam tak zingah kangmei chhuak venna tura aerosol based dah thar leh air condition awmze nei zawk a nih theihna atana rel air-tightness siam ṭhat te chu a langsar zualte an ni bawk.

Nimina PM Modi-a'n rel a vai liamte chu; Rajasthan-a Vande Bharat rel pathumna ni tur, Udaipur-Jaipur Vande Bharat Express; Tirunevelli leh Madurai zawm tur, Tirunelveli-Madurai-Chennai Vande Bharat Express, Hyderabad-a Kacheguda aṭanga Bengaluru-a Yeswantpur zawma passenger 530 phur thei Hyderabad-Bengaluru Vande Bharat Express, Vijayawada-Chennai Vande Bharat Express, Bihar leh West Bengal inkara km 532 zet tlan tur Patna-Howrah Vande Bharat Express, Kerala-a Vande Bharat rel pahnihna tur Kasargod-Thiruvananthapuram Vande Bharat Express, Rourkela-Bhubaneswar-Puri Vande Bharat Express, Jharkhand leh West Bengal inkara rel tlan chak ber leh kar khata ni ruk tlan tur, Ranchi-Howrah Vande Bharat Express leh, Jamnagar-Ahmedabad Vande Bharat Express te an ni.