Kargil indona hmun khualzinte tlawh theihin hawn a ni

Kashmir hmar lam, Gurez valley-a hmun sang lai taka inkalpawhna chu India leh Pakistan sipaite inkahna thlen fona ni mah se, ram pahnihte hian inkahhai an puan chu zawm ve vein, thla 43 zet chu silai ri hriat a ni ta lo. Hei hian mipuite rilruah beiseina sang tak a siam bakah, kumina tourist map siama hmun tlawh theihte zingah telh a ni ta bawk.

India leh Pakistan-in inkahhai puan an zawm ṭhat avang hian khualzin hipna remchang a nih beiseina a lian hle.

Gurez valley hi 1999-a Kargil indona thlenna hmun, Ladakh-a Kargil Drass sector chhunga awm, Mushkoh valley nen inzawm vat tura beisei a ni. Helai valley pahnihte zawmtu inkalpawhna hmun sang ber chu Kaobal Gali niin, km 130-a thui a ni. Gurez valley-ah hian mi 38,000 vel an cheng a, kumin chhung ringawt pawhin khualzin 50,000 an nei tawh a ni. Deputy Commissioner, Owais Ahmad chuan kum 2020 hma lamah chuan khualzin an ngah ber ṭumin khualzin 5,000 an neih chauh thu a sawi.