NIA-in Khalistan firfiak zawn chhuah beihpui thlak

National Investigation Agency (NIA) chuan UK, US, Canada, Dubai, Pakistan leh ram danga cheng, Khalistan firfiak ni ngeia hriat mi 19-te hming tar chhuakin, India rama heng firfiakte bungrua leh thil neihte hi hrensak vek a nih tur thu an sawi.

Ni hnih liam taa Khalistan firfiak leh inṭhen darhna kalpui pawl, Sikh for Justice hruaitu ni ngeia hriat, Gurpatwant Singh Pannun chungchang chhui chhuah a nih hnuah NIA te chuan an thu dawn bawhzuiin heng Khalistan firfiak 19- te nihna hi tlangzarhin, an hmalak dan tur an puang chhunzawm nghal bawk a ni. Firfiakte hian sakhaw behchhanin India aṭanga Punjab tana inṭhen hranna tur an kalpui a, India-in a phal loh, inṭhen darhna kalpui, Sikh for Justice pawl dinin, he pawl kaltlang hian Canada leh Australia-ah 'Punjad Independence Referendum' te an siam a ni. India sorkar chuan he referendum hi pawi a tih thu sawiin, Canada sorkar chu hma la turin a lo ngen tawh bawk.

NIA-te hian Inrinni khan Amritsar-a Pannun-a in leh in hmunte chu a hrensak tawh a ni. Pannun hian Punjab-ah hian thubuai 22 neiin, heng zinga pathum chu midang fuih pawrhna lam thil a ni a, hmanni mai khan Canada-a India mi Hindu awmte chu haw turin vauna a lo siam tawh bawk a ni.