Mann ki Baat vawi 105-na hmang

Prime minister Narendra Modi chuan thla tina a hman ṭhin, radio kaltlanga thu a sawina, Mann ki Baat vawi 105-na chu nimin khan a hmang.

Nimina Mann Ki Baat-ah PM Modi hian India-in ram ropui tak leh sumdawnna lama lian tak a nih ṭhin laia a hman ṭhin, 'Silk route' an tih chu a hriat reng thu leh, kumina G20 summit neih zawh taka India-in India-Middle East-Europe economic corridor hawn a sawi chhuah thu a sawi.

"G20 member atana African Union lak luh a ni chuan khawvel ram dangte mit hmuhah India chu hruaitu dinhmunah a chawi kang a ni. G20 thlenna hmun 'Bharat Mandapam' chu hmun lar a ni tawh bawk," tiin, mi tam takin chu lai hmun chu thlalakna hmun atan an hmang tih a sawi. India ṭhatna hi khawvelin an tem chho ṭan mek a, G20 summit neih zawh taka khawvel ram hrang hrang palai nuai telin India ram hmun hrang hrang an han hmu leh fan kual vel hnu phei kha chuan India dinhmun hi a kang chak hle a ni, a ti.

Gurudev Rabindranath Tagore-a kaihhnawih thil, Santiniketan leh Karnataka-a Hoysala temple te World heritage site-a puan thar a ni chu lawmawm a tih thu Modi hian a sawi bawk a, World Heritage site zinga India hnam leh culture nena inzawm tlat hmunte lak luh belh a ni zel chu thil ṭha tak a nih thu a sawi bawk. India hian World heriatge site zinga chhiar hmun 42 lai a nei tawh a ni.

Prime Minister chuan October 2 chu Mahatma Gandhi pian cham a nih anga hemi puala hmun hrang hranga faina hun hman a ni tur chu lawmawm a tih thu a sawi bawk. Gandhi pian cham puala Swachhta hi Sewa tlangzarh hi October 1 aṭanga hman ṭan a nih tur thu leh, mipuite tel ṭheuh tum turin a chah. Hunpui lo thleng chho tur pualin mipute chu ram chhunga thil siam lei uar deuh deuh turin a sawm bawk.