Rs. 2,000 note tawp tawh dawn

Reserve Bank of India (RBI) chuan kumin May 23 aṭang khan 'clean note policy' kalpuiin, Rs. 2,000 note chu tihtawp a ni tawh dawn tih a sawi. September 30, 2023 thleng hi hun hawn a ni a, September 30 hma hian Rs. 2,000 chu bank-ah thleng emaw, deposit emaw vek turin hriattirna an chhuah. September 30 hnu lamah hi chuan Rs. 2,000 note hman leh siam a ni tawh dawn lo.

RBI chuan an thuchhuaha an tarlan danin, Rs. 2,000 note te hi account neihna bank-ah deposit mai tur a ni a, deposit tam theih lamah bituk a awm lo niin an sawi. Mahse deposit pangngai tih dawna thil ṭul zawng zawng leh Know Your Customer (KYC) te chu a la ngai vek thung a ni.

Basic Savings Bank Deposit (BSBD) emaw Jan Dhan account neite tan chuan deposit tam theih lama bituk awm chu a ngaia la kalpui tur a ni thung a, heng account-a Rs. 2,000 note deposit turte chuan ni khat atana deposit tam theih lam bituk hi an pel thei chuang lo a ni. Income Tax Rules-a Rule 114B-in a phut angin, bank emaw post-office emaw ni khata Rs. 50,000 aia tam deposit turte chuan PAN (Permanent Account Number) card an neih tel a ngai bawk.

Pawisa thleng turte tana hriat tur an chhuahah RBI chuan, September 30 thleng hian RBI Regional Office 19-ah Rs. 2,000 note hi thleng theih a ni dawn tih sawiin, bank branch remchang hnai berah pawh thleng theih a nih tur thu an sawi bawk a ni.