Union Minister-in Lighthouse festival hawng

Union minister of ports and shipping, Sarbananda Sonowal chuan Pathianni khan Goa-a Fort Aguada-ah Indian Lighthouse festival a hawng. Sonowal chuan sorkar laipuiin ram chhunga lighthouse hlun tak tak 75 te chei ṭhat a tum thu a sawi.

Sonowal chuan,"Lighthouse festival chu hun kal tawha tuipui chunga kan sulhnu ropui leh mawi tak takte thlir letna tur atana thil ṭha tak tur a ni a, he thlir letna aṭang hian kan rama lighthouse hlui tawh tak takte leh kan ram rohlu kan chhar chhuah leh theih kan beisei a ni," a ti. Sorkar laipui hian hmasawnna hnathawhna atan bakah enkawlna leh kawng kawh hmuh tura inpuihna kawng ṭha zawk neih a nih theihna atan Lighthouse Act, 1927 chu Marine Aids to Navigation Act, 2021 in a thlak."He dan thar hnuaiah hian Heritage Lighthouse kalpui niin, sorkar laipui chuan kawng kawhhmuhtu eng pawh ṭanpuina pein, heritage lighthouse-ah a puang thei dawn a ni. Heng lighthouse-te hi kawng kawh hmuhtu satliah mai ni tawh loin, zirna puitu, khualzin hip atan leh culture kaihhnawih chawikanna atan hman zui an ni tawh dawn a ni", tiin Sonowal hian a sawi bawk.

"Tuipui kama ṭanpui vartu awm rengte hi hriat hlawh loin an awm rei lutuk a, lawngpu leh lawng tam tak tana zan thim ber hnuaia beiseina eng petute an ni tih hi he Lighthouse festival kaltlang hian puan chhuah kan tum dawn a ni," tiin, Lighthouse-te chu zirna puitu atan leh khualzin hipna atan pawh an ṭangkai thei dawn niin Union Minister hian a sawi.