Congress-in Women's Reservation Bill duh khawp lohna lantir

Congress party chuan nimin khan ram chhung hmun hrang hrangah Women's Reservation Bill an duh khawp lohna leh, PM Modi sorkarin lan mawi chauh tuma a thiltih nia an puhna lantirin a rualin press conference an nei.

Congress hian khawpui 21-ah hmeichhe hruaitu 21 bultumin press conference an nei a, MP, Rajani Pail chuan Ahmedabad-ah press mite kawmin, Congress Mahila chief, Netta D'Souza chuan Hyderabad-ah press conference a nei ve bawk. Anni bakah hian Ranjeet Ranjan, Alka Lamba, Amee Yagnik, Ragini Nayak, Shama Mohamed leh midang eng emaw zatin ram chhung hmun hrang hrangah press conference an nei a ni.

Congress media and publicity department hotu, Pawan Khera chuan khawpui 21-a hmeichhe hruaitu 21-in press conference 21 an neih tur hi puangin, an thupui tur chu Women's Reservation Bill hminga Modi sorkarin mi a phatsanna hailan tih a nih thu X-ah a tarlang.