Criminal law pathum hian inhremna aiin rorelna dik a ngaipawimawh : Amit Shah

Union home minister Amit Shah chuan Pathiannia Bar Council of India buatsaih, International Lawyers' Conference hmanpuiin, criminal law thar pathum an duan chu mipuite mamawh ang, India nihphung mil leh constitution-in min pek anga India khua leh tuite dikna leh chanvo pekna tur a nih thu a sawi. Criminal law pathumte chu misual hremna ngawr ngawr ni loin, harsatna tawktute tana rorelna dik pekna tur a ni, a ti.

Amit Shah chuan,"India rama misual hremna dan kan neihte chu awp kan nih hun laia dan a la ni a, bill tharte erawh chu awp kan nih lai sulhnu dah ṭhain, India nihphung mil ngeia siam a ni. Heng dante hi kum 160 dawn a ral hnuah tihdan thar nena chhawp chhuah chauh a ni a, sorkar pawhin dan hman a nawm theihna atan tihdan thar pathum a ruahman tel a ni. Chung zinga a hmasa ber chu e-court a ni a, inter-operable Criminal Justice System (ICJS)-in dawtin, a pathumnaah heng dan pathum ruahmante tana hmanraw thar buatsaih a ni," tiin a sawi.

Sorkar laipui buatsaih criminal law pathumte chu tunlai mila duan a nih thu sawiin, dan hman lai, hlui tawh tak chu British awpna puitu chauh a nih thu leh, rorelna dik pek aiin hremna a ngaipawimawh zawk a ti. Mipui kut thlak ṭhin chungchangah pawh dan thar siam a nih thu leh, infuihpawrhna section chu paiha, misual hremna atana khawtlang hna thawh ang chi pawh belh a nih thu a sawi.

Shah chuan,"Dan pathum leh tihdan pathum buatsaihte chuan kum 10 chhung lekin rorelna dik pek kawnga khawtlai awm ṭhin chu a tireh dawn a ni," a ti. Lawyer-te ngaihdan chu a pawimawh thu sawi bawkin, kal khawmte chu criminal law thar pathum atana rawtna an neih apiang Union Home Secretary hnena hriattir turin a chah bawk.

Parliament monsoon session neih zawh takah August 11 khan Indian Penal Code, 1860, Criminal Procedure Act, 1898, leh Indian Evidence Act, 1872 te thlakna turin Bharatiya Nyaya Sanhita, 2023, Bharatiya Nagarik Suraksha Sanhita, 2023 leh Bharatiya Sakshya Adhiniyam, 2023 te chu Lok Sabha-ah Amit Shah hian a pu lut a ni. Mahse, heng dan tharte hi Parliamentary panel standing committee a la zir chiang mek a ni.