Kum 2003 aṭanga hman ṭan, Vibrant Gujarat Global summit chu September 26 leh 27 hian Gujarat-a Ahmedabad-ah hman a ni. Prime Minister Narendra Modi pawhin he summit-in kum 20 a tlinna puala hun hmanna telpui tur hian nimin khan Ahmedabad-ah a kal. Ahmedabad-a Vibrant Gujarat Global summit a hman zawhah hian Chhotaudepur-a Bodeli pan lehin, hetah hian Rs. vbc 5,200 chuang man project hanthawhna tur lungphum a phum leh dawn a ni.
Vibrant Gujarat Global Summit hman ṭan a nih aṭangin kumin hi a kum 20-na a ni a, Ahmedabad-a Science City-ah hun hman tur niin, industry intel khawm, trade & commerce huanga mi challang tak tak bakah entrepreneur thar lam tak tak te, higher and technical education college zirlai te an tel dawn a ni. Summit Prime Minister Narendra Modi bul ṭan niin, khawvel huapa neih a ni a, 2019 summit-ah khan ram 135 zet aṭangin mi sang chuang he summit-ah hian an tel a ni. 
Summit a hmanpui zawh lamah hian PM Modi hian hmasawnna hna thawhna tur hrang hrang lungphum a phum dawn bawk a, heng zingah hian 'Mission Schools of Excellence' programme hnuaia classroom thar eng emaw zat siamna tur, smart classroom, computer lab, Science, Technology Engineering and Mathematics (STEM) lab leh school infrastructure eng emaw zat a tel a ni. Heng project-te hi Gujarat mai ni lo, ram pum tana hlan a nih tur thu Prime Minister Office (PMO) chuan a sawi a, Rs. vbc 4,500 ruahman a ni. 
PM hian 'Vidya Samiksha Kendra 2.0' te, Vadodara district-a awm, Sinor taluka-a Odara Dabhoi-Sinor-Malsar-Asa road an tih zawma Narmada lui chunga lei thar dawhna tur te, Dahod-a tui pek chhuahna tur, Chab Talav redevelopment project te, Vadodara-a chan chhe zawkte tana in sak thar 400 te, Gujarat thingtlang khua 7,500 chuanga Village Wi-Fi project bakah Godhra, Panchmahal-a kawng chhawng leh Broadcasting Infrastructure and Network Development (BIND) hnuaia Dahod-a FM radio studio thar sakna tur atana lungphum te a phum nghal dawn bawk a ni.