AIADMK-in BJP an thawhpuina titawp

All India Anna Dravida Munnetra Kazhagam (AIADMK) chuan Thawhṭanni khan BJP nena an thawh dunna an tihtawp thu leh, BJP kaihhruai, NDA an chhuahsan thu an puang. Tamil Nadu-a BJP hruaitu K. Annamalai hian Chief Minister hlui CN. Annadurai chanchin mawi lo takin a sawi a, Chief Minister hlui tho leh AIADMK chhunga an dah san em em, J. Jayalalithaa chungchang pawh mawi lo takin a lo sawi bawk a ni. BJP hruaitu ṭawngkam avang hian Tamil Nadu-a AIADMK hruaitute chuan Annamalai chu state BJP president ni tlak lo leh ngaihdam dil turin an lo ti tawh bawk a ni.

AIADMK general secretary, KP Munusamy chuan Chennai-a party MP, MLA leh district hruaitute nena meeting an neih thu sawiin,"Tamil Nadu-a AIADMK party hruaitute inhmu khawm chuan lungrual takin BJP nena kan thawh dunna tihtawp thu hi kan pawm a ni. State chhunga BJP hruaitute hian ṭul lo taka AIADMK hruaitu hlui hming an sawi chhia hi kan lungawi lo hle a ni," tiin, kum 2024 inthlan chu AIADMK leh a thawhpuite'n BJP tel loa an hmachhawn tur thu a sawi.

AIADMK hian BJP nena an thawh dun tawh china inthlan zawng zawngah hnehna an chang lo nasa ṭhin hle a, 2021-a state assembly inthlanah pawh khan seat 136 nei ṭhinin seat 75 chauh an la thei a, DMK leh Congress ṭang kawpin rorelna an chhuhsak tawh a ni. Kum 2019 Lok Sabha inthlanah pawh a hmaa seat 37 nei ṭhin khanseat 1 chiah an la thei thung a, an elpui DMK erawh chuan seat nei miah loin seat 39 an la thung. Hei vang hian AIADMK hian BJP thawhpui hi 2024 inthlan atana an chak lohna a nih rinna an nei lian hle a ni.