Bengaluru-a lo neitute bandh huaihawtah mi 200 chuang man an ni
Karnataka-a lo neitute intel khawm chuan nimin khan Bengaluru-ah bandh huaihawtin, bandh an huaihawt chhan hi Cauvery Water Management Authority (CWMA) thuchhuahin Tamil Nadu tana Cauvery lui tuikhuah aṭanga nitin tui cusec 5,000 sah tura a thupek dodal nan an ti a ni. Hetih lai hian Karnataka Chief Minister Siddaramaiah chuan Thawhṭanni khan lungawi lohna lantira bandh huaihawt chu a dodal loh tur thu sawiin, tharum thawhna erawh thleng lo se a duh thu a sawi.
Cauvery Water Management Authority hian Cauvery lui tui khuah aṭang hian Karnataka hian Tamil Nadu tan tui sah ṭhin tur hian thupek tichhuak mah se, Karnataka sorkar chuan tui a tlem avangin Tamil Nadu tana nitin tui sah hi rem a tih loh thu a sawi a, hei hi Karanataka-a lo neitute leh Cauvery lui kuang vela huan thlai neite'n tui lama an harsatna an thlen vang a ni. Supreme Court chuan September 22 khan CWMA awm laia state pahnihte thubuaia inrawlh chu a tihtur a nih loh thu a sawi bawk a ni.
Nimina Bengaluru-a bandh huaihawtah hian lo neitute bakah pro Kannada organisation te pawh an tel a ni. Bandh hi Freedom Park, Raj Bhawan leh Town Hall-ah te neih tum ni mah se police te chuan Freedom park-ah chauh bandh huaihawt phal a nih thu an sawi thung. Bandh avang hian mamawh zuar dawr ṭhenkhat chauh hawn a ni a, Bengaluru District Collector chuan school leh college zawng zawng tan chawlh a puang bawk a ni. Zirna in bakah hian sorkar office, bank, ATM, sumdawng lirthei leh bazar hmunpui te chu khar vek a ni bawk.