Smart City list thawh khatna tichhuak

Urban Development Minister Venkaiah Naidu chuan Ningani khan Smart City-a siam tur khawpui list thawh khatna a tichhuak.

Smart City list hmasa berah hian khawpui 20 telh an ni a, heng khawpui thlan bikte hian state leh central sorkar chuan smart city siamna tur hian kum nga chhungin cheng vaibelchhe 500 ve ve an dawng ang.

Smart City atana thlante hi nikuma Smart City Challenge intihsiakna aṭang thlan chhuah an ni a, intihsiaknaah hian khawpui 97 list thehluh an ni a, heng khawpuite hian cheng vaibelchhe 2 ṭheuh an dawng nghal a ni. Service level, infrastructure leh track record aṭangin thlan an ni a, Minister Naidu chuan he intihsiakna hi civil service exam ang tluka hautak a nih thu a sawi. Intihsiaknaah hian state leh local administrator-te chuan zawhna 43 an chhang a ni.

List pakhatnaa tel lo khawpuite chu intihsiaknaah hian an tel leh thei dawn a, April thla hian round 2-na puan a ni ang. List hmasa bera khawpui 20 thlanchhuah zinga 13 te hi World Health Organization-in khawvela khawpui boruak bawlhhlawh zual 20 a thlan zingah an tel.

Minister Naidu chuan mayor-te chuan an municipality ṭheuhten hma an sawn theihna tura rim taka thawk turin a ngen. Sorkar laipui chuan khawpui hrang hrangtne foreign investor an hip luh theihna turn credit rating sytem pawh a siam thuai dawn tih a sawi a, "Khawpui tinte chuan credit rating hi an zawm a ngai dawn a, anih loh chuan pawn lam aṭangin tumahin investment an tih duh lo ang," a ti.

Prime Minister Narendra Modi chuan kum 2020-ah chuan ramchhunga smart city 100 siam hman a tiam a, heng khawpuite hian internet connection ṭha, e-governance bakah quality infrastructure, waste management leh public transport rintlak an nei vek dawn tih a sawi.

Sorkar laipui hian nikum June thla aṭang khan mayor leh municipal commissioner-te tan hian workshop leh training programme hrang hrang a lo buatsaih tawh a ni.

Smart City List hmasa ber tihchhuaha khawpui telhte chu :

1 Bhubaneswar, Odisha

2 Pune, Maharashtra

3 Jaipur, Rajasthan

4 Surat, Gujarat

5 Kochi, Kerala

6 Ahmedabad, Gujarat

7 Jabalpur, Madhya Pradesh

8 Visakhapatnam, Andhra Pradesh

9 Solapur, Maharashtra

10 Davangere, Karnataka

11 Indore, Madhya Pradesh

12 New Delhi Municipal Corporation

13 Coimbatore, Tamil Nadu

14 Kakinada, Andhra Pradesh

15 Belagavi, Karnataka

16 Udaipur, Rajasthan

17 Guwahati, Assam

18 Chennai, Tamil Nadu

19 Ludhiana, Punjab

20 Bhopal, Madhya Pradesh