Bihar CM-in mipui court siam chhunzawm leh dawn

Bihar Chief Minister Nitish Kumar chuan hun eng emaw chen a chawlhsan hnuin, 'janata durbar' (people's court) chuan February 1 aṭang hian a siam chhunzawm leh dawn.

Official-te chuan janata durbar hmang hian CM chuan state mipuite'n harsatna an tawh hrang hrangte a lo ngaihthlak sak dawn a ni.

Janata Durbar hi kum 2006, April thla
aṭang khan CM hian a buatsaih ṭan a ni. Nikum khan assembly inthlan neih dawn avangin tihtawp a ni a, mahse CM hian February thla aṭang hian a siam chhunzawm leh tawh dawn a ni.

CM Kumar chuan janata durbar hi a chenna inah a buatsaih dawn a, hemi hmang hian rorelna langtlang zawka kalpui a nih dawn bakah, mipuite puihna hna pawh zau zawkin an thawk thei dawn niin official-te chuan an sawi. Bihar CM lo ni tawh zinga hetianga mipui nawlpuite nena indawrna mumal tak siam hi Nitish Kumar tih loh chu an la awm ngai lo.

Janata Durbar hi state mipuite pawhin an ngaihven hle a, he huna tel tum hian state chhung hmun hrang hrang aṭangin CM chenna in an pan khawm ṭhin. CM chuan mipuite harsatna thlente chu lo ngaithlain, an buaipuitu official-te leh police-te chu a ṭul anga hma la nghal turin a hriattir ṭhin. State khawpuia janata durbar buatsaih hi mipuite'n an ngaihlut avangin CM hian district headquarters tinah a buatsaih zui tir bawk.