MCD worker-te'n nawrh huaihawt

Municipal Corporatoins of Delhi pathum hnuaia thawk, mi nuai 1.5 chuangte chuan hlawh an lak theih loh avangin Nilaini aṭang khan ni thum awh tur nawrh an huaihawt

Hnathawkte nawrh huaihawt hian khawpui chhungah harsatna a thlen avang≠in Delhi High Court chuan an thil phut chungchang ngaihtuah sak turin sorkar laipui, Delhi sorkar leh civic body pathum- North Delhi Municipal Corporation, South Delhi Municipal Corporation, East Delhi Municipal Corporation bakah Delhi Development Authority te chu hriattirna a pe tawh a, February 2 hian an chhanna pekte ngaihtuah a ni ang.

MCD hnuaia union 20 velin nawrh hi an huaihawt a, an zingah hian doctor, engineer, huan enkawltu, hmun tifaitu leh midangte an tel a, Jantar Mantar-ah an pungkhawm a ni.

Akhil Bharaitya Safai Majdoor Congress president Rajendra Mewati chuan, "Hnathawktu zinga a tam zawk hi thla hnih aṭanga thla li chhung hlawh la lo an ni tawh a, kan arrear pawh hun rei tak hren khawtlai sak kan ni tawh bawk. Hei vang hian ni thum chhung kan lungawi lohna lantirin, khawlaite pawh tihfai a ni dawn lo a ni," a ti. Nawrh huaihawt zingah khawlai tifaitute an tel vangin Delhi khawpui kawtthlerte pawh a bal phah hle.

Delhi Municipal corporations-ah hian BJP-in sorkarna a chelh mek a, Delhi sorkar hnuaiah an awm lo a, central-ah report pawh an pe zawk zel a ni. Mahse an fund erawh chu sorkar laipui leh Delhi sorkar aṭangin an dawng ṭhin.

Official-te chuan civic body pathum-a hnathawkte hlawh pe tur hian cheng vaibelchhe 500 vel a ngai dawn niin a sawi. Mahse Delhi Minister Kapil Mishra chuan Delhi sorkar chuan a sum pek tur ang chu a pechhuak vek tawh tih a sawi a, municipal corporation mayor pathumte pawhin hei hi ziakin an nemnghet tawh tih a sawi.

Minister Mishra chuan, "North MCD hnenah cheng vaibelchhe 892, East MCD hnenah cheng vaibelchhe 465 leh South MCD hnenah cheng vaibelchhe 668 kan pechhuak tawh a, heng sumte hi engtin nge an tih kan hre lo," a ti.