Rohith case: SC/ST zirtirtute'n chaw ngheiin nawrh huaihawt

Hyderabad Central University-a SC leh ST zirtirtute chuan Dalit research scholar, Rohith Vemula intihhlum chungchangah mawhphurtua puhin, College Vice Chancellor leh Vice Chancellor in-charge te bang turin an phut a, nimin khan chaw ngheia nawrh an huaihawt.

Zirlaite pawhin Rohith-a hrem a nih chungchanga inrawlhte hrem ngei phutin nawrh an huaihawt chhunzawm zel a, nimina VC in-charge Vipin Srivastava-a'n non-teaching staff te meeting a neihpui lai pawhin a chenna in kawtah an pungkhawm a ni. Hemi hnu hian zirlaite chuan campus pawn lamah kawng zawh zuiin, vice-chancellor lim an hal.

January 17-a hostel room-a inawkhluma hmuh, Rohith-a tana rorelna dik tak a thlen phutin Andhra Pradesh leh Telangana university tam zawka zirlaite pawhin nimin khan class an boycott bawk.

SC and ST Teachers Forum chuan thuchhuah siamin, VC Appa Rao leh interim VC -te ban a, university-a zirnate pangngai taka chhunzawm leh a nih theihna turin chaw ngheiin an nawr dawn tih an sawi.

Rohith Vemula thih hnu hian zirlai lungawi lote'n nawrh huaihawt a, VC ban tura an phut vangin Pathianni khan VC hian chawlh a la a, VC hna chelh lailawk tur hian Srivastava chu ruat a ni. Mahse Srivastava hi Rohith leh Dalit zirlai dang pali-te hrem an nih theihna tura thutlukna siamtu, Executive Council sub-committee hotu a nih avangin zirlaitne VC atana dah lailawk hi an duh lo a ni.