Rohith case: Zirlaite'n rampum huapin nawrh huaihawt tum

Ramchhunga zirlai pawl hrang hrangte chuan Hyderadad university-a research scholar, Rohith Vemula intihhlum chhana mawhphurtute hrem phutin ram pum huapa nawrh huaihawt an tum.

Dalit zirlai, Rohith Vemula leh midang pali-te'n university-in a hrem hnuah Rohith hi hostel-a a ṭhianpa room-ah a inawkhlum a ni. A thih hnu hian khawpui hrang hrangah zirlaite'n lungawi lohna an lantir tawh a ni. Ramchhunga zirlai pawl 200 chuan national joint action committee dinin, rampum huap≠in nawrh hi an huaihawt dawn a ni.

Joint committee chuan Rohith-a piancham, January 30 hian amah hriatrengna pualin Chalo Delhi (Let's March to Delhi) huaihawt an tum tih an sawi. January 30 hi Rohith-an kum 27 a tlinna tur a ni.

Rohith-a kalna, Hyderabad Central University-ah chuan zirlaite'n Rohith-a thih danah lungawi lohna leh hrem a nih chhanah a mawhphurtute chunga action lak phutin chaw ngheiin an nuar mek. Chaw ngei zinga pakhat chu a dinhmun a ṭhat loh avangin Thawhlehni khan univeristy health centre-ah hruai a ni.

Zirlai thihnaa inhnamhnawiha an puh zinga mi, University Vice Chancellor Professor Appa Rao Podile chu Pathianni aṭang khan chawlh a la, a aiawh lailawk turin Vipin Srivastava dah a ni. Interim VC Srivastava chuan zirlai-te chu an nawrh titawp turin a ngen a, nawrh an chhunzawm zel chuan an zirna lam thlengin a nghawng buai thei dawn a ni, a ti.

Zirlai nawrh huaihawt leh eptu party-te chuan Dalit hnamte chu enhran an ni tih an sawi a, university-a Dalit zirtirtu 15-te pawhin zirlai nuarte hi thlawpin, administrative post an chelh lai aṭanga banna an lo thehlut tawh bawk.

Dalit zirlai panga-te hrem an nihnaah hian union minister pahnih, Bandaru Dattetreya leh Smriti Irani-te chu inrawlha puhin, zirlaite chuan bang turin an phut a ni.

Rohith-a pa, Vemula Naga Mani Kumar chuan a fapa thih dan hi sorkarin judge
ṭanglai chhui tir se a phut thu a sawi. Chi inthliarna chungchang bakah, a fapa intihlum chhanah hian thil dang lian zawk chhui chhuah tur a awm thu a sawi bawk.

Kumar chuan, "Vaddera hnam, Backward Classes catergory a ni a, media-te hnenah Rohith-a Scheduled Caster certificate tihlan chu a pi-in thu dik lo hmanga a laksak a ni. He thil hi kei leh ka nupuiin kan hre ve lo," a ti.

Politician tam takte thiltih dan chu a dem thu sawiin, "Ka fapain nawrh a huaihawt lai khan politician tumahin campus-ah an tlawh lo a, a thih hnuah chauh an kal a ni. University hi caste politics khelhna hmun tur a ni lo," tiin a sawi. A fapa chu lehkha thiam thei, rilru pawh huaisen tak a nih thu sawiin, mahni intihlum mai chi a nih loh thu Kumar chuan a sawi a, hei vang hian a thih dan dik tak chhui chian ngei a phut thu a sawi.