Damdawi man tlawma zawrh tur tipung dawn

Sorkar laipui chuan Jan Aushadhi scheme hnuaia man tlawm zawka damdawi zawrhchhuah tur a tipung.

Man tlawma damdawi zawrh tur hi chi 439 a ni tawh a, heng zingah hian cancer leh lung lam damdawite a tel. Heng damdawite hi 40-50% discount-a zawrh an ni ang.

Pharmaceuticals department chuan damdawi man tlawma hralhchhuahna tur, Jan Aushadi store hi 300 hawn a, March thlaah 300 hawn belh hman a tum a, kum 2017-ah chuan ramchhung hmun hrang hrangah dawr 3,000 neih hman a tum a ni. Tunah hian dawr a hawn 121-ah damdawi man tlawma hralhchhuah theih hi chi 45 chauh a nei a ni.

Official chuan sorkarin cancer, diabetes leh lung na enkawlna damdawi to lutuk chu a vei hle a ni tiin, Jan Aushadi scheme hmang hian direct price regulation hmang kher loin damdawi man tihtlawm a tum dawn a ni, a ti.

Jan Aushadi scheme hi kum 2008-09 khan sorkar hmasa, UPA sorkarin a hawng a, he scheme hi flagship program pawimawh tak ni mah se, a nih tur angin a hlawhtling lo a ni. Industry lama mithiamte chuan a chhan pahnih a awm nia sawiin, a pakhatnaah chuan sorkar laipuiin state sorkarte a hrilh hneh tawk loh vang a ni a, a dang lehah chuan an dawrah hian damdawi lei tur an neih mumal loh
ṭhin vangin customer-te'n pan tlakah an ngai lo niin an sawi.