India-in Republic Day vawi 67-na a lâwm

India chuan nimin khan Republic Day vawi 67-na ram pumah a lawm a, a lawmna pui ber New Delhi, Rajpath-a neih≠ah France president Francois Hollande chu khuallian a ni.

Republic Day parade-a a vawi khatna atan member 123 awmna, French Army contingent te chu parade-ah hian an tel a, President Pranab Mukherjee chuan parade chibai a chhanglet.

Nimina Republic Day lawmnaah hian India rama hnam hrang hrangte nunphung pholang thei turin state hrang hrangte chuan tableau an lantir a, Union Ministry hnuaia department hrang hrang pawhin an hnathawhte tarlanna, tableau an lantir bawk. Kum 26 hnua a vawi khatna atan Remount Veterinary Corps chuan Army dog squad te parade an neihtir bawk a ni.

Border Security Force (BSF) regiment te chuan Republic Day lawmnaa kum 66 chuang an lo lantir tawh, camel chunga chuangin parade an nei a, sipai bang (ex-servicemen) te pawhin a vawi khatna atan ram tana an hnathawh hrang hrangte tableau kaltlangin an lantir.

Indian Army te chuan ral≠thuam chi hrang hrang- T-90 Bhishma tank, Infantry Combat Vehicle BMP II (Sarath), Mobile Autonomous Launcher (BrahMos Missile System), Akash weapon system, Smerch Launcher Vehicles leh Integrated Communication Electronic Warfare System te mipui hmuh≠ah an pholang.

Indian Air Force (IAF) chuan khuarel chhiatna a thlen ṭuma chhanchhuah leh chhawmdawl hna an thawh dante tableau hmangin an pholang a, Uttarakhand, Jammu and Kashmir, Yemen leh Nepal rama chhanchhuah hna thawhna atana thlawhtheihna chi hrang hrang an hman- C-17 Globemaster, C-130 Hercules leh MI-17V5 aircraft model te an pholang.

Indian Navy pawhin tableau hmangin tuna Make in India programme hnuaia Kochi lawng siamnaa siam mek, aircraft carrier- Vikrant an pholang bawk.

Republic Day lawmna avang hian Delhi khawpuiah venhimna khauh taka kalpui a ni a, Rajpath bakah Delhi khawpui leh a chhehvelah hian India hmun hrang hranga central security force personnel 50,000 vel venghimna pe tura dah an ni a, CCTV 15,000 vuah a nih bakah silai kap thiam (sniper) 1000 vel dah an ni bawk.

President Pranab Mukherjee chuan Thawhṭannia Republic Day thuchah a sawiah democracy kalphung vawn nun zel a pawimawh thu sawiin, "Kan zingah mi ringhlel a, kan thiltihte sawisel reng ṭhin te, kan laka helte leh thil phut nei rengte awm
ṭhin mahse hei hi democracy-in a ken tel a ni. Mahse democracy-in eng dinhmunah nge min dintir tih pawh kan ngaihtuah tel a ngai a, infrastructure, manufacturing, health, education, science leh technology-a investment kan tihte chuan chak takin hma min sawntir mek a, tun
aṭanga kum 10 emaw 15-ah chuan India ram aṭangin retheihna min la umbotir dawn a ni," a ti.

Prime Minister Narendra Modi chuan Republic Day puala thuchah a sawiah India danpui chu vawnghima, chhawm nung zel turin mipuite a ngen.

"Vawiin hian India ramin danpui a neih theihna atana tha thawhtu mi huaisente kan hre reng a, Constitution drafting committee chairman, BabaSaheb Ambedkar chungah zahna ka hlan nghal a ni. Kan danpui hi a chipchiar bakah a huapzo a, dan lehkhabu satliah mai ni loin khawtlang nun inkaih≠hruaina lehkhabu ṭha a tling a ni. Kan dikna chanvo chauh a dah pawimawh ber lo a, kan mawhphurhnate pawh a tarlang vek a ni," tiin Modi chuan a sawi.

Modi chuan Union cabinet-in tun hnaia Crop Insurance Scheme a pawmpui chungchang sawiin, scheme hmang hian agricultural sector hmel thlak danglam a nih tur thu a sawi a, loneitute thawkrim tak takte chuan social security an nei thei tawh dawn a ni, a ti. Scheme hmang hiansorkar chuan loneitu kan unaute chu an mal lo tih a hriattir a, sorkar chu an tan a awm reng ṭhin a ni tih kan hriattir a ni.

Prime Minister Modi chuan India ram venhimna atan tha thawhtu, Indian Army leh paramilitary force te lakah lawm thu sawiin, Republic Day lawmna hmanpuitu France President Francois Hollande lakah lawm≠thu a sawi nghal bawk.