NIA-in state 6-a hmun 51 an dap

National Investigation Agency (NIA) te chuan Khalistan firfiakte nena inzawmna nei nia hriat an zawnna kal zelah nimin zing khan case pathum kaihhnawihah state paruka hmun 51 zet dapin, in eng emaw zat an luhchhuah bawk.

NIA-te hmun dap hi Khalistan firfiakte nena inzawmna neia hriat, Lawrence Bishnoi, Bambiha leh Arshdeeo Dalla te gang thawhpui ta a ni. Heng gang-te hi Canada pawn lama Khalistan ṭanpuitute an ni a, anni bakah hian NIA chuan inzawmna nei ngeia a hriat mi 43 te pho chhuakin, mipuite chu heng mite thil neih leh bungrua an hriatte sorkarin a hrensak theih tur chu hriattir zel turin a chah bawk.

Chandigarh leh Amritsar-a Khalistan firfiak Gurpatwant Singh Pannun thil neihte chu Unlawful Activities (Prevention) Act hnuaiah NIA hian a lo hrensak tawh a ni. Pannun bakah hian September 21 khan Punjab leh Haryana-a gangster tlanchhia, Goldy Brar-a ta nia hriat hmun 1,000 lai an dap tawh bawk. Goldy Brar hi NIA-te'n gangster wanted list-a an neih a ni a, Canada Winnipeg-a gang mi vek, Sukha Dunike thahnaa inhnamhnawiha rinhlelh ber a ni.

Nimin zing khan NIA-te chuan Punjab Moga district-a zu zuara sumdawng in an dap a, hepa hnen aṭang hian Dalla hian pawisa a phut ṭhin nia hriat niin, eng emaw zat a lo laksak tawh bawk. Punjab bakah hian Uttarakhand-a silai dah ṭhatna hmun, Udham Singh Nagar-a awm chu an luhchhuah bawk a, Clementown police station area-a awm, Dehradun district chhunga mi chu an dap bawk. NIA chuan heng gang leh an thawhpui nia hriat apiangte chanchin leh thil neihte bakah, an thawhpui, an chhungte, an tana thawk nia hriatte pawh NIA hnena report zel turin mipuite an ngen a. Hemi rual hian Lawrence Bishnoi, Jasdeep Singh, Kala Jatheri/Sandeep, Virender Pratap/Kala Rana, leh Joginder Singh te hming leh thlalak an tar chhuak a, heng gangster tam zawk hi Canada-a inkhuarte an nih thu an tarlang bawk.