India-in Afghan mipuite a thlawp zel ang : Ruchira Kamboj

Afghanistan chung­changa United Nations Security Council briefing chu September 27 khan neih a ni. He hunah hian UN-a India palai nghet, Ruchira Kamboj chuan India leh Afghanistan-in hmakhawsang aṭanga inzawmna an neih dante sawiin, India chuan Afghanistan-a boruak ralmuang a awm theih nan leh Afghan mipuite chu ṭanpui an ngaihna zawna ṭanpui zel an tum thu a sawi.

Ruchira Kamboj hian, "Afghanistan ram ṭhenawm leh a mipuite tana ṭhian ni bawk India chuan he rama remna leh muanna a lo awm theihna atan hian theihtawp chhuah a inhuam a ni. Hemi thu-ah hian mihring ṭanpuina pek ngai ang chi te, Afghan mipuite aiawh zo sorkar siam kawngah te, ruihhlo tawlh ruk leh firfiaka chetna do kawngah te, hmeichhia, naupang leh hnam tlem zawkte humhim chu a ngaipawimawh zual dawn tih ka sawi duh," tiin, India-in Afghanistan tana hma a lak tawhna chu Security Council Resolution 2593, August 30, 2021-a pawm takah a awm thu a sawi bawk.

"India hian Afghan zirlaite tan scholarship a la pe chhunzawm reng a, heng bakah hian, chaw, damdawi, vaccine, chhiatna thleng atana inenkawlna, thlasik thawmhnaw leh zirna atana pawimawh chi hrang hrang pawh a pe tawh bawk a ni. Afghanistan-a mihring dam khawchhuahna dinhmun chhe zel hi vei ngai leh hna hmasaa kan neih ngai thil a ni. UN agency ṭhenkhat nen a hmunah kan thawkho a, Afghanistan mipuite tan hian India chuan a theih ang ang a ti zel bawk," a ti.

Afghanistan-ah hian Taliban-te'n rorelna an chan hnuah hmeichhe dinhmun a chhe zual hle a, press mite zalenna hlihsak niin, mimalin dikna chanvo a neihte tihtlem zel a ni bawk. Dinhmun chhe zawka ding leh ṭanpui ngaite ṭanpuia hnathawk ṭhinte pawh ṭhenkhat chu an thawh chhunzawm phalsak an ni lo a, a ṭhen chu phal chin tlemte nena thawhtir an ni bawk. Tharum tel loa nawrh huaihawtte pawh man leh sawisak an nih zel bawk avangin Afghanistan-a mihring dinhmun hi United Nations Security Council chuan a chhe hle niin a sawi.