"ISKCON hian talh turin bawng an hralh ṭhin"- Maneka Gandhi

Union minister hlui, BJP MP Maneka Gandhi chuan sakhaw pawl pakhat, International Society for Krishna Consciousness (ISKCON) te chu ram chhunga milem berte an ni tiin, bawng vulhna hmun aṭangin ran talhtute hnenah bawng an hralh ṭhin niin a sawi. ISKCON hi Hare Krishna (Hindu sakhaw peng pakhat, Krishna ngaipawimawh biktu) kalpuitu langsar tak an ni a, khawvel hmun hrang hrangah temple za chuang leh zuitu tam tak an nei a ni.

Union Minister hlui leh ransate chanvo humhalha hma la ṭhin (Animal rights activist) Manekha Gandhi chuan he thu hi social media lamah tarlangin,"ISKCON hian mipuite an bum a ni. Bawng enkawlna neiin sorkar hnen aṭangin hamṭhatna an dawng a, ram pawh zau tak an nei. Hengahte hian bawng, a hnute la sawr loh pakhatmah an awm lo a, bawng no pawh an awm hek lo, a awmzia chu an hralh vek tihna a ni. ISKCON te hian an bawng enkawl zawng zawngte hi ran talhtute hnenah an hralh a, an nunna chu bawnghnutea innghat tia au chungin mipui an bum a ni," tiin, Andhra Pradesh-a ISKCON enkawl Anantpur bawng in a tlawhnaa a thil hmuhte a sawi.

Hetih lai hian ISKCON chuan Maneka Gandhi puhna hi phain, ISKCON thupuangtu Yudhistir Govinda Das chuan ISKCON chu bawng humhalhna kawnga a hma hruaitu leh sulsutu an nih thu a sawi. "Smt. Gandhi hi ransate chanvo humhalhtu leh ISKCON duhsaktu langsar tak ni siin hetiang thu a sawi hi kan hrethiam lo a ni. Kan bawng ina bawngte hi an dam chhung zawng kan enkawl a, khawiah mah hralh an ni ngai lo," tiin a sawi thung.