FSSAI-in ei tur funna atan newspaper hmang lo turin ngen

Food Safety and Standards Authority of India (FSSAI) chuan Nilaini khan thuchhuah siamin, India ram chhunga ei tur siama zuar chhuak ṭhinte chu an ei tur siam dah nan leh pack-na atana newspaper hmang lo turin an chah.

FSSAI chuan state-a ei tur chungchanga thuneitute nen an thawhho thu leh, ei tur pack-na atana newspaper hman chu khap vat a nih theihna atan hma an lak thu sawiin, mipuite hnena a ṭhat lohna puanzar hna pawh an thawh tur thu an sawi.

FSSAI CEO, G. Kamala Vardhana Rao chuan ei tur pack-na atana newspaper leh khawl chhutna tui kai lehkhate hman ṭhin chuan mihring hriselna a khawih pawi theih thu sawiin, an thuchhuah siam chu ei siama ei zawng leh a leitute hnenah an tana pawi thei hrilh tumna a nih thu a sawi. "Newspaper chhutna atana tui (ink) hman hian bioactive thil paiin, hei hian hriselna kawngah a chhe zawngin nghawng a nei thei a, kan ei turahte kaiin kan ei tur a tibawlhhlawh a, kan ei tel khan kan taksa tan ṭhat lohna tam tak a nei a ni," a ti. Rao chuan khawl chhutna tuiah chuan ei tura kai thei chemical, lead ang chite a awm avangin khaureia kan hriselna khawih pawi thei a nih thu a sawi bawk.

Thuchhuah an siamah hian Food Safety and Standards (Packaging) Regulation, 2018 pawh tarlang telin, he dan hnuaiah hian ei tur dahna atan leh tuamna atana newspaper leh a anpui dang reng reng hman chu khap tlat a ni. Ei tur tuam, inpekna atan leh khuhna atana hman piah lamah ei tura tel (oil) tihhulna atana hman pawh a khap a ni bawk.