Indian Navy-in Swavlamban 2.0 tlangzarh dawn

Indian Navy Vice Chief of Naval Staff, Vice Admiral Sanjay Singh chuan Nilaini khan Indian Navy-in a thuneihna hnuaia hmsawnna hrang hrang, ralthuam, hmanrua, khawl leh a dangte lak luh a nih dan an tarlanna, Swavlamban 2.0 chu kar tharah an tihchhuah tur thu a sawi. Swavlamban 2.0-ah hian Navy-in an thlen tawh chin tarlan a nih dawn bakah kal chhunzawm zel an tum dan tarlan a ni bawk ang.

Navy-te hian nikum khan Azadi ka Amrit Mahotsav hmalakna pakhat atana an neih; Micro, Small and Medium Enterprises (MSME) leh startup te nen ṭangkawpa technology changkang ber ber 75 siam chhuah chu an puitlin a, heta an thlen chin pawh hi Swavlamban 2.0-a seminar leh exhibition neih a nih hunah phochhuah a nih tur thu Vice Admiral hian a sawi. "Heng technology-te hi khawvel huap pawha a ṭha thei ang ber tura duan leh siam an ni a, mahse, India siam a nih avangin a siamna atana sum sen chu a tlem zawk fe a ni," a ti. Technology thar siam chhuahna lama an hmalakna an khumnate chu SPRINT (Supporting Pole-Vaulting in R&D through Innovation for Defence Excellence) te, Naval Innovation and Indigenisation Organisation (NIIO) leh Technology Development Acceleration Cell te an nih thu a sawi bawk.

Swavlamban 2.0 hman a nih tur thu puannaah hian Commodore Arun Golaya chuan NIIO din a nih hnuah naval officer te'n thil siam chhuah patent 50 an theh luh tawh thu leh, MSME leh statrup-te nen ṭangkawpa hmanraw thar 150 an siam tlin tawh thu a sawi. Nikum khan Navy-te hian startup leh MSME hnen aṭang SPRINT hnuaiah hmanraw thar atan rawtna 1,100 an dawng a, MSME hnuaia mi firm 118 te chu an rawtna pawmsak vek niin, ralthuam siamtu huangah firm 100 dawn lak luh belh an ni bawk a ni.