Delhi CM-in MCD worker nuarte a thlawp

Municipal Corporation of Delhi (MCD) worker, an hlawh an lak theih loh avanga nawrh huaihawt mekte chu Delhi Chief Minister Arvind Kerjiwal-a chuan a thlawp thu sawiin, tun kar chhung ngei hian an buaina hi chinfelsak an nih a beisei thu a sawi.

Arvind Kejriwal-a chuan, "MCD hnuaia thawkte thil phut hi ka thlawp a, an hlawh hi a la ngei tur a ni," tiin nimin khan a Twitter-ah a tarlang.

Tiamchin awm loa nawrh huaihawt mek, MCD worker zingah hian sanitation worker 60,000 vel an tel a, hei vang hian Delhi khawpui chhung hmun tam takah bawlhhlawh a inchhek khawm nasa tawh hle. Heng bawlhhlawh chhek khawmte hi Delhi Public Work Department (PWD) chuan thenfai hna an thawk mek a ni.

CM chuan PWD-te hnathawh chu fakin, AAP volunteer-te pawh PWD-te an theih ang anga pui turin a chah nghal a ni. AAP hian a hmain khawpui chhunga bawlhhlawh intiang khawm tam tak chu an lo thianfai tawh bawk a, minister pawh eng emaw zat an tel.

MCD worker-te hian nimin khan ni nga nawrh an huaihawtna a ni tawh a, an thil phutte tihhlawhtlin a nih hma chuan nawrh chhunzawm zel an tum. Nimina East Delhi-a kawngpui thianfai tura PWD worker chhuakte chu MCD sanitation worker-te hian lo dangin an intibuai. MCD worker-te chuan PWD staff-te hnathawh hi an phal lo a, bawlhhlawhte an lo thenfai chuan an nawrh chuan awmzia a neih loh phah an hlauthawng a ni. PWD hian khawpui chhunga bawlhhlawh intiangkhawmte thianfai tur hian motor 93 a hmang mek a ni.

Delhi-a sorkarna siamtu, AAP leh civic body pathumaa sorkarna siamtu, BJP-te chu MCD worker-te harsatna tawhah hian an inpuh tawn. Delhi Deputy Chief Minister Manish Sisodia chuan BJP-in MCD worker-te chu fuihpawrhin, minister-te chenna leh office bulahte bawlhhlawh an paihkhawm tir niin a puh. Ningani khan MCD worker-te hian Deputy CM Sisodia kawtah wheelbarrow hmangin darkar thum dawn bawlhhlawh lakhawmin, truckload 2 vel zet an chhungkhawm a ni. Tourism Minister Kapil Mishra chuan BJP kaihhruai MCD chu khawpui chhunga bawlhhlawhte thianfai thei loah puhin, BJP chuan Delhi mipuite hrem a tum a ni, a ti.

Hetihlai hian BJP chuan AAP sorkar chu corporations hnena sum a pek turte pe≠chhuak duh loah a puh let thung. Delhi BJP hotu, Satish Upadhyaya chuan CM hnenah open letter thawnin, municipal corporations pathuma hnena Delhi sorkarin sum a pek tur, cheng vaibelchhe 3,000 chu pe chhuak turin a ngen.