Rohith-a kha Dalit a ni lo: Sushma Swaraj
Hyderabad University-a research scholar, tun thla tira hostel room-a intihlum, Rohith Vemula kha Dalit hnam a ni lo tih External Affairs Minister Sushma Swaraj-i chuan a sawi.
Nimina Thane-a chanchin thar lakhawmtute a kawmnaah minister chuan he thu hi a sawi a, "Thubuai an chhui meknaah he thudik hi hriat a ni. Rohith-a kha Dalit a ni lo," tiin, hnam inthliarna vanga buaina tawk nia sawi chu thu belhchian dawl lo a ni, a ti.
Hetihlai hian Rohith-a nu chuan NDTV in a kawmnaah, Dalit Mala hnam a nih thu leh a pasal chu Vaddera hnam a nih thu a sawi. Rohith-a pa chuan naupangte an nih laia a chhuahsan avangin a fate pawh Dalit hnama an inpawm vek thu a sawi bawk.
Nikum August thlaa RSS zirlai pawl, ABVP hotu pakhat kut thlaka puh an nih avangin Rohith leh Dalit zirlai dang pali-te chu hostel aṭanga hnawhchhuah an ni a, campus-a bungrua te an hman khapsak an ni bawk. Mahse Rohith-a leh a ṭhiante hi campus pawn lamah puan-inah an khawsa zui a, tun thla tir lam khan hostel-a a thianpa room-ah a inawkhlum a ni.
Rohith-a thihna chung≠changah hian zirlai pawl leh eptu pawlte chuan BJP leh college thuneitute mawhphurtuah puhin, nawrh an huaihawt a ni. Inrinni khan Congress vice president Rahul Gandhi chuan Rohith-a tan rorelna dik phuta university campus-a chaw ngheia nawrh huaihawt mek, a chhungte leh zirlaite chu a tlawh. Rahul Gandhi chuan zirlaite'n chi inthliarna avanga zirna ina zirlai intihhlumna thleng ṭhin venna atana 'Rohith Act' siam an phut chu a thlawp thu sawiin, Rohith-a ang bawka midangte nawrna nasa lutuk avanga mahni intihlum chu zirna in hrang hrangah an awm fo a ni, a ti.
BJP chuan Rahul Gandhi-a'n university campus a tlawh hi sawi≠selin, zirlai thihna chu politics khelhna hmanrua atana hmangah an puh. Parliamentary Affairs Minister M. Venkaiah Naidu chuan UPA sor≠kar lai khan university campus-ah Dalit zirlai intihlum pakua an awm tih sawiin, mahse heng hunlai hian Rahul Gandhi chuan university hi tlawh loin, eptu party te pawh sorkarin an thih dan a chhuina report chu lo nghak zawk turin a hrilh niin a sawi.